പേരയ്ക്ക മോഷണം – നന്ദകുമാര്‍ ചൂരക്കാട് എഴുതിയ കവിത

പേരയ്ക്ക മോഷണം എന്നതാം പത്ര

വാര്‍ത്ത ഞാന്‍ ഖിന്നം വായിച്ചിരിക്കെ 

അതില്‍ നിറയുന്നു പാവമൊരു 

പൈതലിന്‍ നേര്‍ക്കു നടന്നതാം 

ക്രൂര പൈശാചിക പീഡനം

ഒരു ചെറു പേരയ്ക്ക മോഷണമല്ലയോ 

പൈതല്‍ ചെയ്തതാം അക്ഷന്തവ്യകുറ്റകൃത്യം
 

സ്വര്‍ണ്ണമല്ലല്ലോ അത്, ധനസമ്പത്തുമല്ല 

അതു വെറും നാട്ടില്‍ വളരുന്ന ചെറു

പേരയ്ക്ക ഒന്നുമാത്രം

(എന്തിത് ഉണ്ടാമോ അതുനുള്ളിലെങ്ങാനുമൊരു 

ചെറു വൈരമോതിരമെന്നറിഞ്ഞതില്ല!)

സദാചാര ഗുണ്ടായിസമെന്നപോല്‍ തോന്നുമീ 

ചേഷ്ടക്കുകാരണമെന്തായിരിക്കാം?

നിസ്വനാം മധുവിന്റെ നേര്‍ക്കുയര്‍ന്നതാം

മര്‍ത്ത്യന്റെ മാനസികവൈകൃതമോ
 

അതോ അബലകള്‍തന്‍ നേര്‍ക്ക് ഇന്നുമുയരുന്നതാം 

സ്വേച്ഛാധികാര ക്രൗര്യങ്ങളോ

എത്രയോ പേരയ്ക്ക നിത്യവും കൊത്തി 

പകുത്തുകൊണ്ടോടുന്നു അണ്ണാനും കിളികളും  

ഇടിച്ചുവീഴ്ത്തുവാനാമോ ഇവകളെ

ആകാശത്തിനോളം ഉയര്‍ന്നുപൊങ്ങി

എത്ര നികൃഷ്ടമീ ഹീനകൃത്യം അതീ സാക്ഷരത 

കേരളത്തിനു ഭൂഷണമോ
 

പൈതങ്ങള്‍കാട്ടുമീ കുട്ടി കുസൃതിയെ 

നേരമ്പോക്കായി കരുതിടാതെ

പേരയ്ക്കമോഷണ കുറ്റമാരോപിച്ച് നടത്തിയതാം  

ഹീനകൃത്യത്തിനെ കാടത്തമെന്നല്ല, 

ഗുണ്ടായിസവുമെന്നല്ല, 

കാപാലികത്വമെന്നേ ചൊല്ലിടാനാവൂ

ഇവന്‍ മാനുഷനല്ല രാക്ഷസനുമല്ല 

പൈശാചികത്വം നിറഞ്ഞ നരാധമന്‍ താന്‍
 

Content Summary: Malayalam Poem ' Perakka Moshanam ' written by Nandakumar Choorakkad