ജീവിതവിജയത്തിനളവുകോൽ – റ്റോജോമോൻ ജോസഫ് എഴുതിയ കവിത

ജീവിതവിജയം തന്നളവുകോലിന്നെന്തിതു പാരിതിൽ

പൊന്നോ പൊരുളോ

ആസ്തിതൻ കീർത്തിയോ

കനകംകൊണ്ടൊരാലയം തീർത്തവനോ

സ്നേഹംകൊണ്ടു കൂടുകൂട്ടിയവനോ

ആരാവാം വിജയമാം ചേലേറും ചിറകേറി പറന്നുയർന്നോൻ

സമ്പത്തുകൊണ്ടളക്കുന്നു നാമിന്നു ജയത്തെ

ഇതു സത്യമോ, മിഥ്യയോ

എന്നിലെ ചിന്തതൻ ചൂളയിലുരുകിയതോ

ധനമുള്ളവരേവരും ജയിച്ചവരോ

പോലെ പാവങ്ങളേവരും പരാജിതരുമോ
 

ഉയരണമീചോദ്യമെന്നന്തരംഗത്തിൽ സദാ

മാറ്റണം മനോഭാവമിന്നു നാം

മാറ്റേണ്ട വീക്ഷണത്തിനായി ധരിണിയിൽ

വെറുംകൈയ്യാൽ പാരിലെത്തിയ മർത്യനിന്നു

ഒഴിഞ്ഞ കരത്താൽ പൂഴിയോടു വിടപറയും

കാഴ്ച നാം കാണുന്നുവോ കണ്ണീരാൽ

പിന്നെയെന്താവാം വിജയത്തിനളവുകോൽ

സ്വത്തുകൊണ്ടു കീഴടക്കാനാവുമോ

അനശ്വരവിജയമിന്നു ഭൂമിയിൽ

ആത്മനിർവൃതി നൽകുമോ അതോ

ശാന്തസുന്ദരശയനമിന്നു

വാങ്ങാനാവുമോ സാമ്പത്തിനാൽ
 

ക്ഷിപ്രക്ഷണികഖ്യാതി തരും

ധനമോ വിജയമെനിക്കേകുമാറു

പിന്നെയെന്തിതു വിജയതീരമണക്കും നൗക നമ്മെ

മാറ്റണമെന്നന്തർഗതമിന്നു

മാറ്റണം ചിന്തതൻ ചൂഴ്ന്നിറങ്ങിയ വേരുകൾ

ഓർക്കുക ധനമെന്നും ധരിണിയിൽ

മനുജനു ജീവനോപാധി മാത്രമെന്ന നേരു നാം

വേണ്ടതു വാങ്ങിയും വ്യർഥമായതകറ്റിയും

കാട്ടണമാർജ്ജവം നാം കലങ്ങാതെ തെല്ലുമേ

താൻ താൻ ചെയ്യും കർമ്മത്തിൻ

കനത്താൽ നിജപ്പെടുത്തണമെന്നും

ജയപരാജയമെന്നതോർക്കണമെപ്പോഴും നാം
 

എന്നിലെ നന്മതൻ ജ്വാലയാൽ

പൂരിതമാവണമെൻ സ്വത്വമെപ്പോഴും

തമസ്സിൽ തിരിയുടെ തെളിമയേകി അണിയണം

ഞാനീശന്റെ രൂപമീ ജഗത്തിലൊരിക്കലെങ്കിലും

മാറണം ഞാനൊരു ചിരാതായിന്നു

വഴിയടഞ്ഞവന്റെ വഴിയോരത്തു വെളിച്ചമേവാൻ

ജയതോൽവിതൻ തുലാസ്സിൻ തൂക്കം

നിർണ്ണയിപ്പതെൻ ചെയ്തികളെന്ന

പച്ച പരമാർഥമറിയണമിന്നു നാമുറപ്പോടെ

സ്നേഹത്താൽ മനുജനെ കീഴടക്കും

മനമാണു മൂല്യമേറും ധനമെന്ന ബോധ്യമീ മൃത്തികയിൽ

മിഴിവേകണമെന്നും തളർത്താതെ നമ്മെ
 

Content Summary: Malayalam Poem ' Jeevithavijayathinalavukol ' written by Tojomon Joseph