ആത്മവ്യഥ – സുമിത മേലേവീട്ടിൽ എഴുതിയ കവിത
Mail This Article
ഒരു ചിത്രം വരയ്ക്കാൻ
കഴിഞ്ഞിരുന്നെങ്കിൽ
എന്ന് ഞാൻ
തീവ്രമായി
ആഗ്രഹിക്കുന്നു
വർണങ്ങളുടെയല്ല,
ശൂന്യതയുടെ ചിത്രം
നഷ്ട പ്രതീക്ഷകളുടെ ചിത്രം
വ്യർഥമായ മോഹങ്ങളുടെ ചിത്രം
നനവില്ലാതെ വിണ്ടുകീറിയ
മനസ്സിന്റെ ചിത്രം
ഉരുകുന്ന
ജീവിതങ്ങളുടെ ചിത്രം
അതു പകർത്താൻ
എന്റെ കൈയ്യിലുള്ള
വാക്കുകൾ
മതിയാകാതെ വരുന്നു
അമ്പത്തൊന്നക്ഷരങ്ങളും
തോറ്റു മടങ്ങുന്നു
ഒരു കാൻവാസിലേക്കവയെ
തുറന്നു വിടാൻ
കഴിയാതെ ഞാനും
പേറ്റുനോവനുഭവിക്കുന്നു.
രൂപമെടുക്കാൻ കഴിയാതെ
ഉള്ളിലിരുന്നവ
വീർപ്പുമുട്ടുന്നു
കലഹിക്കുന്നു
തല തല്ലി കരയുന്നു
ഉന്മാദത്തിന്റെ
ചങ്ങല കിലുക്കം
കേൾപ്പിക്കുന്നു
എന്റെ പ്രാണനെ
അവ ബന്ധിയാക്കുന്നു
കനൽ വീണപോലതു
പൊള്ളിയടരുന്നു
ശ്വാസം കിട്ടാതെ
പിടയുന്നു
പുറത്തേക്കൊരു വഴി കാണാതെ
തളർന്നു
ഒടുവിൽ എന്നുള്ളിലവ
ജീവനൊടുക്കുന്നു
ഒരു ജന്മം കൊടുക്കാൻ കഴിയാതെ
ഞാനും.
Content Summary: Malayalam Poem ' Athmavyatha ' Written by Sumitha Meleveettil