കിനാക്കൾ – ക്ലേലിയ ജോൺ സി. എഴുതിയ കവിത

നീ തന്ന കിനാക്കൾ

പൊഴിഞ്ഞൊരീ

വഴിത്താരയിലെൻ

യാത്രയിപ്പോൾ

പലകുറി കുനിഞ്ഞവരെ

പ്പുൽകണമെന്നു 

വ്യഥാ നിനപ്പൂ ഞാൻ

ഒരു വേളയെൻ

നെഞ്ചകം പൂകിയവ

പുനർജനിക്കുമോ
 

എൻ ഓർമ്മത്താളിലിപ്പഴുമാ

മർമ്മരം കേൾക്കാം

നീ വന്നു പോയതിൻ

മഷിയടയാളങ്ങൾ

മനസ്സാകെ വെന്ത 

നേരത്തായിരുന്നത്
 

ഇടിച്ചു കുത്തിയൊരു

മഴയായ് പെയ്തു നീ

ഞാനോ മടിച്ചു പെയ്തൊരു

ചാറ്റലായ് നിന്നു

നീ പെയ്തു തോർന്ന

നേരമെനിക്കെന്നെ

നഷ്ടമായി
 

പിന്നെ നീ പോയി 

എവിടെക്കെന്നില്ലാതെ

ഒരു യാത്ര പറയാതെ

പറന്നകന്നു
 

നിലാവിലും വഴി മറന്ന

രാക്കിളിയായ് ഞാനലഞ്ഞു

ഇനിയൊരു വേനലിൽ

ഞാൻ നിന്നെപ്പുൽകുമോ?

നീയെന്നെയെന്നേക്കുമായ്

വെടിഞ്ഞതോ...?
 

ചോദ്യങ്ങളിലുടക്കി വീഴുന്നതീ

പകലുകൾ

സ്വപ്നമായെങ്കിലും 

നീ പെയ്തിറങ്ങണം

അത്രമേൽ നിന്നെ

പ്രണയിച്ചിവൾ

എൻ കാതിലിപ്പഴും

മൂളുന്നതാ പ്രേമ ഗീതം

നീയെനിക്കായ്

മാത്രം മൂളിയോരീണം.
 

Content Summary: Malayalam Poem ' Kinakkal ' Written by Clelia John C.