ഒറ്റയാവുമ്പോൾ – ദീപ നായർ എഴുതിയ കവിത

ഒറ്റയാവുമ്പോൾ നീയെന്നൊരൊറ്റ 

വാക്കിലൊതുങ്ങുന്നു ഞാൻ

ഒറ്റയാവുമ്പോൾ നിന്റെയോർമ്മകളിൽ 

വീണു ഞാൻ മയങ്ങുന്നു 
 

ഒറ്റയാവുമ്പോൾ കിനാവിൻ കൽപ്പടവുകളിറങ്ങി 

ഞാൻ നിന്നിലേക്കെത്തുന്നു

ഒറ്റയാവുമ്പോൾ ഘനീഭവിച്ചുറഞ്ഞുകൂടിയ 

നിൻ മൗനമുരുകുന്നത് ഞാനറിയുന്നു
 

ഒറ്റയാവുമ്പോൾ ഞാനറിയുന്നു നിൻ മൗന-

ചഷകത്തിൽ പ്രണയം നിറഞ്ഞു തുളുമ്പുന്നത്

ഒറ്റയാവുമ്പോൾ ഞാനറിയുന്നു 

നിന്നുൾപ്പൂവിലെ തുടിപ്പുകൾ
 

ഒറ്റയാവുമ്പോൾ ഞാനറിയുന്നു ദൂരെയെങ്കിലും 

നീയെൻ ചാരെയെന്ന്

ഒറ്റയാവുമ്പോൾ ഞാനറിയുന്നു എന്നിലെ 

തുടക്കവുമൊടുക്കവും നീയെന്ന്!
 

Content Summary: Malayalam Poem ' Ottayavumbol ' Written by Deepa Nair