ഇതളടർന്നു ഞാൻ വീണു പോയിടാം

അഴകൊഴിഞ്ഞീ ഭൂമിയിലലിഞ്ഞ് ചേർന്നിടാം

അതിന് മുമ്പെനിക്കൊരു നിമിഷമെങ്കിലും

നിൻ മിഴികളിൽ അമൃത വർഷമാകണം
 

ഇരുളിലന്നു നീ വിതുമ്പിയപ്പോഴും

പുലരി വന്നെന്നെ ഉണർത്തിയപ്പോഴും

കനവിലന്നു ഞാൻ കണ്ടു പുതിയൊരു

പുഷ്പ സുരഭില ശ്രാവണം
 

മൃദുലമാവിരൽ തഴുകി നീയെന്റെ

അധര പൂങ്കുടം മുകരവേ 

അറിഞ്ഞു ഞാൻ നിന്റെ ഹൃദയതന്ത്രിയിൽ 

പടർന്ന രാഗത്തിൻ ശീലുകൾ
 

പ്രണയ നൊമ്പരം ഏറ്റുപാടുമീ 

വിരഹഗാനത്തിൻ നോവിലും

പതിയെ നീയെന്റെ അരികിലായ് വന്നു

മിഴികൾ പൊത്തുന്നതോർത്തു ഞാൻ 
 

വർണ്ണസന്ധ്യകൾ പൊന്നുരുക്കുമീ

പൂമാനത്തിൻ മേലേയായ്

ഒരു കുഞ്ഞു പൂവായ് നീ വന്നുദിച്ചത് 

നോക്കി നിന്നു ഞാൻ
 

പെയ്തൊഴിഞ്ഞ കിനാക്കളൊന്നിൽ

എഴുതി ഞാനൊരു വർണ്ണചിത്രം

കരളിൽ നിറയും കവിത പോലെ

നിൻ കരിവളകൾ ചിതറി വീണുവോ
 

കാണുവാനലയുമെന്റെ മോഹം  

നിന്റെ കാൽപ്പാടുകൾ തേടിനടപ്പൂ

ഇടറിയെൻ നൊമ്പരം ഇരുളിൽ 

പെയ്തൊരു മഴയായ്

ഇമകളിൽ നനവിൻ ഈണവുമായി 

ഇനി ഒരു പുലരിയേ കാത്തു നിൽപ്പൂ.
 

Content Summary: Malayalam Poem ' Amruthavarsham ' Written by Asokan Mavelikkara