ഗൃഹാതുരം – രാജു കാഞ്ഞിരങ്ങാട് എഴുതിയ കവിത

മഴ പെയ്തു തോർന്നാലും

മരം പെയ്തു നിൽക്കുന്ന

കുട ചൂടിയെത്തുന്നു ഗൃഹാതുരത്വം.
 

കുന്നിമലക്കാവിൽ ചുവന്നു തുടുത്തുള്ള

കുന്നിക്കുരുവായ് ചിരിക്കുന്നു ഓർമ്മകൾ

മൺപാതയിൽ വീണ മഞ്ചാടിമണികളിൽ

ഇടവിടാപെയ്യുന്നു ഗൃഹാതുരത്വം
 

പ്രണയങ്ങളിഴചേർന്നൊരിടവഴിയും

വിരഹം വിയർത്ത നടവഴിയും

ആർദ്ര മോഹത്തിന്റെ,യോർമ്മകൾ -

പൂത്തുള്ള

അരുണാഭയാർന്ന സായന്തനവും
 

മഞ്ഞിൽ വിരിയും നിലാക്കിളിയും

തേങ്ങിത്തളരും ഇടനാഴിയും

മരുന്നു മണക്കും മുറിയുടെ ജാലക -

പ്പടിയിൽ വിറയാർന്ന വിരലുകളും
 

കഞ്ഞിക്കൊരു കുഞ്ഞു വാപിളർത്തി

കരഞ്ഞു നിൽക്കുന്നൊരാ ബാല്യകാലം

വായ്ക്കരിയിടാൻ അരിയില്ലാതെ

നിസ്സഹായയായമ്മ വിയർത്തകാലം
 

ഓർമ്മകൾ കനംതൂങ്ങി നിന്നിടുന്നു

അമ്മിഞ്ഞപ്പാൽ മണം പരന്നിടുന്നു

പെയ്തൊഴിയില്ലയീ മണ്ണോടു ചേർന്നാലും

ഗൃഹാതുരമാർന്നൊരാ കഴിഞ്ഞ കാലം
 

Content Summary: Malayalam Poem ' Gruhathuram ' Written by Raju Kanhirangad