അഴൽവീഥികൾ – ശബ്ന രവി എഴുതിയ കവിത

വഴിവിളക്കുകൾ വലവിരിച്ചതിൻ

അരികുതട്ടി നിൻ ചിറകിലഗ്നിയായ്

എരിഞ്ഞു ചാരമായ് കനവിൻ പൂക്കളും

ഉരുകി വെന്തുപോയ് ഹൃദന്തമാകെയും
 

കടലലകൾ പോൽ അഴലലകളോ

ഇരമ്പിയാർക്കുന്നു ഉൾക്കടലിതിൽ

വിഹഗവീഥിയിൽ വിരഹനോവുമായ്

ഒരു ചെറുകിളി പറന്നു പാടുന്നു
 

പകലറുതിയായ് തളർന്ന സൂര്യനോ

ഉരുകി വീഴുന്നു കടലിന്നാഴത്തിൽ.

തമസ്സിലാണ്ടുപോയ് മനവും ഭൂമിയും

ഒരിറ്റു വെട്ടമായ് ഉദിക്കു താരമേ..
 

Content Summary: Malayalam Poem ' Azhalveethikal ' Written by Shabna Ravi