ഓണസുഗന്ധം – രൂപലേഖ ബി. എഴുതിയ കവിത

ചിങ്ങം പിറക്കുമ്പോൾ ഓണമെത്തുമ്പോൾ

മനതാരിൽ നിറയുന്നു ഓർമ്മതൻ തിരകൾ

കാട്ടിലും മേട്ടിലും വള്ളിപ്പടർപ്പിലും

പുഴതന്നോരത്തും പാട വരമ്പിലും

പൂക്കൾ നിറയുന്ന പൊന്നോണ നാളുകൾ
 

പൂവേപൊലി പാടി ഓലപൂക്കൂടയേന്തി 

കുഞ്ഞുങ്ങളോടുന്ന നാട്ടിടവഴികൾ 

തുമ്പപ്പൂ നിറയുന്ന പാടവരമ്പുകൾ 

മുക്കുറ്റിപ്പൂ വിരിയും തോട്ടിന്നിറമ്പുകൾ 

മന്ദാരം പൂക്കുന്ന വേലിപടർപ്പുകൾ 

ചോരച്ചുവപ്പാർന്ന ചെമ്പരത്തിക്കാടുകൾ

കണ്ണെഴുതി നിൽക്കുന്ന ശംഖുപുഷ്പത്തിൻവള്ളികൾ
 

ഓടപ്പൂ, ഈച്ചപ്പൂ, കണ്ണാന്തളി ചന്തവും 

കനകാംബരവുമാ കാട്ടുകുറിഞ്ഞിയും

തെച്ചി, അശോകം കൊങ്ങിണിപൂക്കളും 

വെണ്മ നിറയ്ക്കുമാ പാരിജാതവും പിച്ചിയും
 

മഴക്കാല മേഘങ്ങൾ പെയ്തൊഴിഞ്ഞ നാളുകൾ

നാടാകെ കേൾക്കുന്ന കൊയ്ത്തുപാട്ടിന്റെ മേളവും

വിളവെടുപ്പിനാനന്ദം നിറയുമാ കളപ്പുരകളും

വിസ്‌മൃതിയിലാണ്ടുപോയ് ആ ഓണത്തിന്നോർമ്മകൾ
 

ഇന്നെത്തിയോണം.. പൂക്കാലമെവിടെ..?  

പൂവിളിയെവിടെ? കൊയ്ത്തുപാട്ടിന്നിതെവിടെ..??
 

ഓലപ്പൂക്കൂടയും ഊഞ്ഞാലുമില്ല 

പൂ നിറയും പാടവരമ്പുകളില്ല,

നെല്ലുനിറയുന്ന കളപ്പുരകളുമില്ല.

പ്രകൃതിതൻ പച്ചപ്പും നന്മയുമില്ല

നാടിന്നൊരുമയും പുഞ്ചിരിയുമില്ല
 

അഴകായ് നിറയുന്നു പൂക്കളങ്ങളെങ്ങും 

പ്‌ളാസ്റ്റിക് കവറിലെ പൂക്കളിൻ വർണ്ണത്താൽ 

ഓണസദ്യയുമെത്തുന്നു ഓൺലൈൻ ഓർഡറിൽ  

ഓണമതിന്നൊരു സെൽഫിയും സ്റ്റാറ്റസും
 

കൊതിപൂണ്ട മനമിന്നു കാത്തിരിക്കുന്നു

വന്നെത്തിടൂമോ വീണ്ടുമാ പൊന്നോണ നാളുകൾ..?
 

കടലോളം നീളുന്ന ഓണപ്പൂവിടങ്ങളും 

നാട്ടിടവഴികളിലെ പൂവേപൊലി ആർപ്പും

നെൽമണിമുത്താൽ നിറയുന്ന കളപ്പുരകളും

നാവിൽ നിറയുന്ന പുത്തരി മാധുര്യവും.
 

പ്രകൃതി തൻ പച്ചപ്പും നന്മയും ശുദ്ധിയും

ശാന്തതയും സ്നേഹവും വർണ്ണത്തിളക്കവും  

നിറഞ്ഞാർത്തു തൂവുന്ന ആനന്ദനാളുകൾ…

സുഗന്ധമായ് നിറയുന്ന പൊന്നോണ നാളുകൾ..
 

Content Summary: Malayalam Poem ' Onasugandham ' Written by Roopalekha B.