കല്ലുകൊത്തിത്തിന്നുന്ന കറുത്ത കുരുവികൾ

കാണാത്ത മരത്തിന്റെ കൈയ്യെത്താക്കൊമ്പത്ത്

തലകീഴായി തൂങ്ങിക്കിടന്നു
 

അപ്രതീക്ഷിതാനന്ദത്തിൽ ആത്മഹത്യചെയ്തേക്കാവുന്ന

ശ്മശാനത്തിന്റെ കാവൽക്കാരനെ പ്രണയിക്കുന്ന

കാൽപനികയായ കുരുവി.

കുയിലല്ല. കാക്കയല്ല.

കുഞ്ഞു കുരുവി.
 

വൃക്ഷത്തലപ്പുകളിൽ തട്ടിനിന്ന വെള്ളത്തിൽ

പ്രതിഫലിച്ച തന്റെ മുഖം കണ്ട്

കറുത്ത കുരുവിക്ക് കരച്ചിൽ വന്നു.

കുരുവി കാണുന്നതും പ്രാവ് കാണുന്നതുമൊരേ

യാകാശമല്ലെന്ന് കാറ്റ് വീശി.
 

ഒടുക്കത്തെ അന്നത്തോടൊപ്പം അമ്മയൂട്ടിയ

രഹസ്യം ചെവിയിൽ മുഴങ്ങി.

അരിയെറിഞ്ഞ് തരുന്നവരിൽ കരുതലുണ്ടാവണമെന്ന്.

ചാവാതിരിക്കണമെന്ന്.

ഹൃദയമിടിച്ചു,

പതിരാണ് നമ്മുടെ പൊരുളെന്ന്!
 

Content Summary: Malayalam Poem ' Kuruviyude Hrudayam ' Written by Gayathri Suresh Babu