മരതക വർണ്ണമാം സഹ്യസാനുക്കളിൽ 

കേരളഭൂമി കേരശാഖികളാൽ വിസ്തൃതം 

കേരളക്കരയിൽ വസിക്കും മർത്യന്

മാതൃഭാഷയാം കൈരളി പെറ്റമ്മ
 

സഹ്യാദ്രി തന്നിൽ വിളങ്ങും വർണ്ണാഭ 

മാവേലി നാട്ടിനെന്നും ഐശ്വര്യം

കേരളഭാഷയാം മലയാളത്തിലുച്ചരിക്കും 

വചസ്സുകളന്യ ഭാഷാ വാണിക്കതീതം 
 

മാതൃഭാഷയാം മലയാളമെന്ന മധുരമാം 

മൊഴി കേരളീയർക്ക് പകരുമൊരാനന്ദം 

പച്ചപ്പരവതാനിയാം മാതൃഭാഷ 

കേരളീയർക്കിന്നു തറവാട്ടമ്മ 
 

സാഹിതീ ദേവിയുടെ മടിത്തട്ടി-

ലുറങ്ങുകയാണോ ഈ കോമളാംഗി 

കേരളത്തനിമയ്ക്കു കോട്ടം തട്ടാതെ 

കാത്തിടും നമ്മുടെയീ കൈരളി 
 

പെറ്റമ്മയുടെ പുകൾ കാത്തുസൂക്ഷിക്കും 

ഈ മലയാളനാട് വാണീടും മക്കൾ 

സഹ്യന്റെ മാറിൽ തല ചായ്ച്ചുറങ്ങും 

കേരളത്തിന് തൻ കൂട്ടാകുമെന്നുമീ കൈരളി...