ഒമ്പതാം മാസം

ഞാൻ തിരുവയറ് ഒഴിഞ്ഞ വിവരം

തുടെന്ന്‌ ചോര വാർന്ന്‌-

ഒഴിയുന്നതിന് മുന്നേ 

വൈറ്റാട്ടി, തമ്പുരാന്റെ

ചെവിക്കാത്തേക്ക് എത്തിച്ച്,

പേര് വാങ്ങി.
 

പെറ്റ വിവരം,

അന്നേരത്തേക്ക് 

എന്റെ കെട്ട്യോൻ പോലും

അറിഞ്ഞിട്ടുണ്ടാർന്നില്ല.
 

കായ്ഫലം കുറഞ്ഞ

കലിപ്പ് അയയാൻ

മുറുക്കി ചവച്ചു നിന്ന അങ്ങേര്,

അപ്പത്തെ തോന്നലിന് 

"കറുപ്പി" എന്ന് വിളിച്ചലറി

ശേഷം നീട്ടി തുപ്പി;
 

പേറെടുത്തെന്റെ മൂച്ചിന്

തള്ള; കൊച്ചിന്റെ കാതിൽ പേര് കേറ്റി,

ചരട് കെട്ടി;

മുലകൊടുക്കുമ്പോളാണ്

ഞാനോർക്കുന്നെ 

വീട്ടിലെ "നായയും" കറുപ്പിയാണെന്ന് 
 

കാലുറച്ച ശേഷം

'മോനുവേണ്ടി'

ഞാനാദ്യമാ

നായയെ

തല്ലിക്കൊന്നു.