നീർപ്പോളകൾ – ജസിയ ഷാജഹാൻ എഴുതിയ കവിത

ഏകാന്ത ജാലകവിരികൾ

മെല്ലെയിളകിയലകൾ

ഞൊറിയുമ്പോൾ

നിന്റെയോർമ്മകളുടെ 

മുങ്ങാങ്കുഴിയിലെനിക്ക്

ശ്വാസം മുട്ടും.
 

വെട്ടിവീഴ്ത്തപ്പെട്ട 

സ്വപ്നശാഖികളുടെ

മുറിവുകൾ കൂട്ടിക്കെട്ടി

ഞാനൊരംബരചുംബിയാകും...
 

വിറപൂണ്ടമൗനവീഥികളിൽ

അടിതെറ്റി നിലം പതിച്ച 

പതം വന്നവാക്കുകളെ

ചുമന്നൊരു വെയിൽ നാളം

വിയർത്തു കുതിരുമപ്പോൾ..
 

അലക്കിയലക്കിയെത്ര

വെളുപ്പിക്കാൻ തുനിഞ്ഞാലും 

പിഴിയുമ്പോഴൂർന്നിറങ്ങുന്ന

നിന്റെ ചെളിക്കറകളിലെന്റെ

ഹൃദയം കലങ്ങും..
 

എന്റെയംബരം താണിറങ്ങും...

പൊലിഞ്ഞു വീണ നക്ഷത്രങ്ങൾ 

നിന്റെ പ്രളയത്തിൽ മുങ്ങും.

എന്നിലെ സാഗരമിരമ്പിമറിയും..

നിന്റെ തീരമില്ലാതെയാകും
 

എന്റെ കാൽച്ചുവട്ടിൽ 

വീണുചിതറുന്ന 

നീർപ്പോളകളിൽ നിന്നും 

അരൂപിയായ നിന്നെ വീണ്ടും 

ഞാൻ കോരിയെടുക്കാൻ 

കൈക്കുമ്പിൾ നീട്ടും !

വൃഥാ... കൈക്കുമ്പിൾ നീട്ടും.