ആറുകാലങ്ങളും ഒരേയൊരു വണ്ടിയും – അൻസാർ ഏച്ചോം എഴുതിയ കവിത

അച്ഛനുണ്ടാക്കിത്തന്നതാണ്

ഓർമയുടെ മ്യൂസിയത്തിലിപ്പഴും

ഒരോരം ചേർന്ന് ഉരുളുന്നു

അതിർത്തിയിടപ്പെട്ട നാലുദിക്കുകൾക്കിടയിൽ

അങ്ങോട്ടുമിങ്ങോട്ടുമോടി

തിരിച്ച് വീണ്ടും വീടുകാണും

കളിവണ്ടി
 

കാലിവണ്ടിക്കിപ്പോൾ ബ്രേക്കില്ല

സർവസീമകളും

ഏതോ കാറ്റിലുരസി

അദൃശ്യമായിരിക്കുന്നു

റ്റീനേജെന്ന് പേരായ

നീണ്ടുനിവർന്ന പാലത്തിലിപ്പോൾ

ഇടതടവില്ലാതെ

ഓടുന്നു കൂട്ടിമുട്ടുന്നു
 

പ്രാരാബ്ധഭാണ്ഡങ്ങളേറ്റിയ വണ്ടി

ഇപ്പോൾ

തിരുവിലോടുകയാണ്

ആരെയൊക്കെയോ ഓർത്ത്

കൂട്ടിമുട്ടാറേയില്ല

വെയില്കൊണ്ടുണങ്ങിയാലും

ഒരു രാത്രിയുറങ്ങിയാൽ

ഫുൾചാർജാവും
 

മൂന്നാമതൊരു കാലുകൂടി ചേർന്ന

വണ്ടിയിപ്പോൾ

സ്ഥിരം വർക് ഷാപ്പ് കയറിയിറങ്ങുന്നുണ്ട്

പ്രാരാബ്ധങ്ങൾ വെട്ടി വീഴ്ത്താൻ

കിതക്കുന്നതിനിടെ

പാർട്ട്സെന്തൊക്കെയോ വീണുപോയെന്നാണ്

പറഞ്ഞുകേൾക്കുന്നത്
 

ഇപ്പോൾ വണ്ടിയുള്ളത്

"എണ്ണ തീരട്ടെ" എന്ന്

കൊതിക്കുന്ന

കുറച്ചധികം കാട്ടാളരുടെ കൈയ്യിലാണ്

ഹലോ,

മിസ്റ്റർ

വണ്ടിയിപ്പോൾ.....

ഇപ്പോൾ......