ADVERTISEMENT

ഇളം തെന്നലിലുലഞ്ഞു കൊഴിയുന്ന 

ഇലകളെ പോലെ

അകലങ്ങളിലേക്ക് പറന്നകലുന്ന 

അപ്പൂപ്പൻതാടിയെ പോലെ

എത്ര ചേർത്തു പിടിച്ചാലും 

കബളിപ്പിച്ചിറങ്ങുന്ന നിശയുടെ  

മൂന്നാം യാമത്തെപ്പോലെ...
 

സുസ്മിതം തൂകി കൺചിമ്മി

യകന്നുപോകുന്ന 

താരകങ്ങളെപോലെ..

ഇലക്കീറിൽ പൊതിഞ്ഞെടുത്ത 

മൗനവുമായ് നീ 

നിഴലായകന്നുപോകുമ്പോൾ 
 

ഓർമ്മകളുടെ ഭാണ്ഡങ്ങൾക്ക് 

സ്നേഹത്തിന്റെ ഭാഷ്യമറിയാതെ 

ദിശതെറ്റി പൊള്ളിയടരുമ്പോൾ

ചേർത്തുവെച്ച ഇഷ്ടങ്ങൾ 

ഒരു പിൻവിളിയാൽ 

പിന്തിരിയുമ്പോൾ
 

പാതിവഴിയിൽ ഇറങ്ങിപോകുന്ന 

സ്നേഹത്തിൻ വാക്കുകൾക്ക് 

മധുരം പകർന്നു നൽകാനാകാതെ 

ശിശിരത്തിൽ ഇലകൾ 

കൊഴിഞ്ഞ ശാഖികളിൽ 

കൂടുകൂട്ടിയ ഒറ്റമൈനയെപ്പോലെ 

വിരഹത്തിൻനോവിൽ

നനഞ്ഞൊട്ടുമ്പോൾ
 

നിശബ്ദമായ വാചാലതയെ 

പെയ്തിറക്കാൻ വർഷന്തർത്തുവിൽ 

കുളിരുള്ള പെയ്ത്തോളങ്ങളെ 

ചുംബിക്കുമ്പോൾ

വസന്തർത്തുക്കളിൽ 

കൊരുത്തെടുത്ത സ്വപ്നങ്ങൾ

നിദ്രകൾക്ക് കാവലാളാകുമ്പോൾ
 

ഗ്രീഷ്മത്തിൽ സൂര്യൻ കളംവരച്ച 

ഒറ്റ നിഴലിനെ പുണർന്നിട്ടും

കഥകളുടെ ആവർത്തന

വിരസതകളിൽ 

ചെത്തിമിനുക്കിയ അക്ഷരങ്ങൾ 

അടർന്നുവീണപ്പോൾ
 

ചില സ്നേഹങ്ങൾ 

മധുരമല്ലെന്ന നിന്റെ 

വാക്കുകളെ കടംകൊള്ളട്ടെ!

അല്ലെങ്കിലും എല്ലാ മധുരങ്ങളും 

മധുരമാകാറില്ലല്ലോ!!!

English Summary:

Malayalam Poem ' Madhuram ' Written by Girija Chathunny

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
അവശ്യസേവനങ്ങൾ കണ്ടെത്താനും ഹോം ഡെലിവറി  ലഭിക്കാനും സന്ദർശിക്കു www.quickerala.com