മഴത്തുള്ളി – നൈന മണ്ണഞ്ചേരി എഴുതിയ കവിത

എവിടെയോ വീണൊരു സങ്കടത്തുള്ളിയായ് 

വർഷ മേഘങ്ങൾ ഇപ്പോഴും പെയ്യുന്നു..

മനസ്സിൽ നിറയുമൊരു വ്യർഥ സ്വപ്നമായി 

വീണ്ടും മഴത്തുള്ളി പെയ്തു നിറയുന്നു..
 

ജീവനായ് കേണ പെണ്ണിന്റെ മനസ്സിലും 

പെയ്തൊഴിയാത്ത നൊമ്പരപ്പൂവായി

ഇനിയും തീരാത്ത മിഴി നീർത്തുള്ളിയായ്

എവിടെയോ മഴ പെയ്തു കൊണ്ടിരിക്കുന്നു..
 

കണ്ടു തീരാത്ത സ്വപ്നങ്ങൾ പോലെ

കനവിൽ ബാക്കിയാം മോഹങ്ങൾ പോലെ

ലാളിച്ചു തീരാത്ത വാൽസല്യമായ്, മഴ 

മാനത്തും മനസ്സിലും തോരാതെ പെയ്യുന്നു..