വെറുപ്പ് – അക്കു അക്ബർ പുതുക്കോട് എഴുതിയ കവിത

മലിനമാകുന്നുമൊരു പുഴപോലെ 

ഓരോ മനുഷ്യനും മലിനമാകും

അഴുകിയ ആയിരം ചിന്തകൾ അവനെ

നാറുന്ന അരുവിയാക്കും
 

തീക്കനൽ പോലെയടുക്കുവാൻ പറ്റാത്ത 

ഒടുങ്ങാത്ത കനലതാക്കും

പുഞ്ചിരിക്കുന്നൊരു നോട്ടവും ഇല്ല

മതം തിരഞ്ഞവൻ നടന്നകലും
 

കീറിപറിക്കുന്ന തെരുവു നായയെക്കാളും

കഠിനമാകും

മനുഷ്യ ഹൃദയങ്ങൾ കീറിമുറിക്കുവാൻ

നാവിനു ശക്തിയേറും
 

മനുഷ്യനെന്നില്ല മൃഗമെന്നതില്ല

കൊട്ടാരമില്ല സൗധങ്ങളില്ല

എന്തിലും ഏതിലും തിരയുന്നു കണ്ണുകൾ 

മതമേത് മതമേത് നിൻ ചോരയേത്...