അന്യഗ്രഹജീവി – സതീഷ് കളത്തിൽ എഴുതിയ കവിത

ഞാൻ മാന്യൻ; 'ഞാനും' മാന്യൻ.

'അതെ,

ഞാനും നീയും മാന്യന്മാർ!'

അപ്പോൾ,

ഈ പകൽമാന്യനാര്?
 

ഞങ്ങളൊരു സംവാദത്തണലിലിരുന്നു.

ഞാൻ പറഞ്ഞു, "അതവനാണ്."

ശരിയാണെന്നു മറ്റവൻ തലയാട്ടി.
 

അന്നേരം,

അവിടെയെത്തിയ ആ 'അവനും'

അവന്റെ ചൂണ്ടുവിരൽ പുറത്തേക്കു നീട്ടി;

ശരിയാണെന്നു ഞങ്ങളും തലയാട്ടി.
 

അങ്ങനെ,

വന്നെത്തിയ ഓരോ ചൂണ്ടുവിരലും

വരുത്തിയ അപരന്മാർ

വട്ടം കൂട്ടുന്ന സംവാദത്തണലിൽനിന്നും 

കണ്ണെത്താ ദൂരവും കാതെത്താ ദൂരവും

മനസെത്താ ദൂരവും താണ്ടി

ചൂണ്ടുവിരലുകൾ പാഞ്ഞുകൊണ്ടിരുന്നു.
 

എന്നിട്ടും,

ആ 'പകൽമാന്യന്‍' മാത്രം

സംവാദത്തണലിലെത്തിയില്ല;

അവനൊരു 'ഗൂഢവാദ സങ്കൽപ' തോടിൽ

സുഷുപ്തിയിലായിരുന്നു!
 

അവസാനം,

അസ്തമയത്തിന്റെ അതിർവരമ്പ്

കടന്നാക്രമണത്തിനെത്തിയപ്പോൾ

'അതവൻ' തന്നെയെന്ന പതിവു കിണ്ടാട്ടംകൊണ്ട്  

ആ സംവാദത്തണൽ താനെ പിരിഞ്ഞു.
 

പുറത്ത്,

കാത്തുക്കിടന്നിരുന്ന യു എഫ് ഒ പേടകങ്ങളിൽ

കേറിപ്പോയവരിൽ ചിലർക്കപ്പോൾ

ഉടലില്ലായിരുന്നു; ചിലർക്കു തലയും!