അടഞ്ഞ വാതിൽ – പ്രകാശ് ചിറക്കൽ എഴുതിയ കവിത

അടഞ്ഞ വാതിൽ...

പ്രതീക്ഷകളുടെ മരണമാണത്.

നിരാശതയുടെ കള്ളിമുള്ളിൽ 

കൊളുത്തിവലിയുന്ന 

ഹൃദയത്തിന്റെ നൊമ്പരം!.

അടഞ്ഞവാതിലിനു മുന്നിലുണ്ട് 

ഇറ്റിവീണ കണ്ണുനീരിന്റെ ഉപ്പ്...;

കാത്തിരിപ്പിന്റെ മടുപ്പ്...;
 

അടഞ്ഞ വാതിലിനു മുന്നിൽ 

വെളിച്ചത്തിന്റെ സൂചി നൂലുകൾ

കെട്ടുപോകുന്നു...,

അതിനപ്പുറം ഇരുട്ടാണ്.

ഇരുട്ടിനു തിരുടന്റെ മുഖമാണ്.

അടഞ്ഞ വാതിൽച്ചുമരുകളിൽ 

ഒരു വെടിയുണ്ട ചീറിക്കടന്നുപോയ 

അടയാളം...;
 

കല്ലിച്ചുറഞ്ഞുപോയ 

നിലവിളികൾ..., ജീവന്റെ അവസാന-

ഞരക്കങ്ങൾ...!

വേട്ടയാടപ്പെട്ടവന്റെ നിശ്ശബ്ദ വേദനകൾ...!

അടഞ്ഞ വാതിലുകൾ...

എന്നും ഭീതിയുടെ വിളനിലങ്ങൾ...