ചിലപ്പോൾ നീ – ഗിരിജ ചാത്തുണ്ണി എഴുതിയ കവിത

ചിലപ്പോൾ 

നീ കാടായിരുന്നു 

പൂത്തുനിൽക്കുന്ന 

മുളന്തണ്ടിലൂടെ ചൂളം 

വിളിക്കുന്ന പെരുംകാട്
 

ചിലപ്പോൾ 

നീ പുഴയായിരുന്നു

പാദസരങ്ങൾ കിലുക്കി 

അമ്പിളിവെട്ടത്തിനോട് 

കൊഞ്ചിചിരിച്ചൊഴുകുന്ന പുഴ 
 

ചിലപ്പോൾ 

നീ കടലായിരുന്നു 

അഗാധഗർത്തങ്ങളിൽ 

സ്വത്വം ഒളിപ്പിക്കുന്ന 

തിരയിളക്കങ്ങളില്ലാത്ത കടൽ
 

ചിലപ്പോൾ 

നീ മരുഭൂമിയായിരുന്നു 

കടലലകൾ തീർക്കുന്ന 

സ്വർണ്ണവർണ്ണമുള്ള മണൽത്തരികളെ 

മാറിലേറ്റുന്ന ഥാർ മരുഭൂമി 
 

ചിലപ്പോൾ 

നീ നാട്ടിടവഴിയായിരുന്നു 

ഇളം കാറ്റിനൊപ്പം 

തുള്ളികളിച്ചുല്ലസിക്കുന്ന 

പാരിജാതപൂക്കളുടെ ഗന്ധമൊഴുകുന്ന 

മണ്ണിടവഴി
 

ചിലപ്പോൾ 

നീ പ്രകൃതിയായിരുന്നു 

അർദ്ധനാരീശ്വര സങ്കൽപം 

കുടികൊള്ളുന്ന

ചരാചരങ്ങളെയുൾക്കൊള്ളുന്ന 

ശക്തിസ്രോതസ്!
 

ചിലപ്പോൾ 

നീ നൈർമ്മല്യമായിരുന്നു 

ഇതൾവിടരുന്ന ഗ്രാമചന്തങ്ങളുടെ 

ശുദ്ധതപോലെ!
 

ചിലപ്പോൾ 

നീയെന്നാൽ ഞാനായിരുന്നു 

കാലമായിരുന്നു!