ആരും കൊതിച്ചു പോകും ഇതുപോലൊരു കുഞ്ഞനിയത്തിയെ; ഉള്ളു തൊടും അഹാനയുടെ കുറിപ്പ്
Mail This Article
ലൂക്കയിലെ നിഹാരിക എന്ന കഥാപാത്രത്തിലൂടെ മലയാളികളുടെ ഹൃദയം കവർന്ന യുവതാരമാണ് അഹാന കൃഷ്ണ. അഭിനയം പോലെ തന്നെ അതിമനോഹരമാണ് അഹാനയുടെ ഇൻസ്റ്റഗ്രാമിലെ ഓരോ എഴുത്തുകളും. അനിയത്തിമാരെക്കുറിച്ചും വീട്ടിലെ രസകരമായ സംഭവങ്ങളെക്കുറിച്ചും അഹാന എഴുതുമ്പോൾ സ്വന്തം വീട്ടിലെ വിശേഷങ്ങളായി ആരാധകരും കേട്ടിരിക്കും. കുഞ്ഞനിയത്തി ഹൻസികയെക്കുറിച്ച് അഹാന പങ്കുവച്ച കുറിപ്പും ചിത്രവുമാണ് ഇപ്പോൾ ഇൻസ്റ്റ സുഹൃത്തുക്കളുടെ ശ്രദ്ധ നേടുന്നത്.
ഇങ്ങനെയൊരു ഫോട്ടോയും കുറിപ്പും പങ്കുവച്ചതിന് ഹൻസിക തന്നെ കൊല്ലും എന്ന രസകരമായ മുഖവുരയോടെയാണ് അഹാനയുടെ പോസ്റ്റ്. തല ചരിച്ച് കിടന്നുറങ്ങുന്ന ഹൻസികയാണ് ചിത്രത്തിൽ! ആ ചിത്രത്തിനു പിന്നിലെ കഥ സരസമായി അഹാന പങ്കു വയ്ക്കുന്നു. വീട്ടിലെ ചേച്ചിക്കുട്ടിയാണ് അഹാന. ഹൻസികയടക്കം അഹാനയ്ക്ക് മൂന്നു അനിയത്തിമാരുണ്ട്. പനിച്ചു കിടന്ന ഹൻസികയെ ഉറക്കാനുള്ള ശ്രമത്തിലായിരുന്നു കഴിഞ്ഞ ദിവസം അഹാന. തല മസാജ് ചെയ്തുകൊടുത്തും കൊച്ചു കൊച്ചു ആവശ്യങ്ങൾ നിറവേറ്റിയും ഉറങ്ങുന്നതു വരെ കൂടെ ഇരുന്ന അഹാനയോട് ഒടുവിൽ ഹൻസിക പറഞ്ഞു, 'അമ്മൂ, എനിക്കറിയാം... ഞാൻ നിന്നോടു കുറെ കാര്യങ്ങൾ ഇങ്ങനെ ചോദിക്കുന്നു എന്ന്. പക്ഷേ, ഒരു ദിവസം ഇതെല്ലാം ഞാൻ തിരിച്ചു ചെയ്തു തരാം... കേട്ടോ'! ഈ വാക്കുകൾ തന്റെ ഉള്ളുലച്ചു കളഞ്ഞുവെന്ന് പങ്കുവയ്ക്കുകയാണ് അഹാന.
അഹാനയുടെ വാക്കുകൾ ഇങ്ങനെ: "കഴിഞ്ഞ ഏതാനും ദിവസങ്ങളായി ഹൻസികയ്ക്ക് പനിയും തലവേദനയുമുണ്ട്. എല്ലാവരുടെയും ശ്രദ്ധ കിട്ടാനായി അവൾ കുറച്ചു കൂടുതൽ ക്ഷീണം കാണിക്കുന്നില്ലേ എന്നായിരുന്നു ഞാൻ ചിന്തിച്ചു കൊണ്ടിരുന്നത്. ഞങ്ങളുടെ വീട്ടിൽ കുറച്ചധികം കുട്ടികൾ ഉള്ളതുകൊണ്ട് ഇത്തരം നാടകങ്ങൾക്കൊന്നും വലിയ ശ്രദ്ധ കിട്ടാറില്ല. ഓ... ഇതൊന്നും സാരമില്ല, ഒന്നുറങ്ങി എണീറ്റാൽ ഇതെല്ലാം ശരിയായിക്കോളും എന്ന മട്ടിലാകും ഞങ്ങൾ!
ഇന്നലെ രാത്രി കടുത്ത തലവേദനയുണ്ടെന്നു പറയുകയായിരുന്നു ഹൻസു. സാധാരണ അവളാണ് വീട്ടിൽ ഏറ്റവും ഒടുവിൽ ഉറങ്ങുന്ന കക്ഷി. ഇന്നലെ പക്ഷെ, അവൾ വേഗം നൈറ്റ് ഡ്രസും സ്വറ്ററും ധരിച്ച് ആദ്യം തന്നെ മുറിയിൽ കയറി. എന്നിട്ട് എന്നോടു ഒരു ചോദ്യം– അമ്മൂ, ഒന്നു മുറിയിലേക്ക് വരാമോ?
ഞാൻ മുറിയിലെത്തിയതും അവൾ ഓരോരോ കാര്യങ്ങൾ ആവശ്യപ്പെടാൻ തുടങ്ങി. തലയൊന്നു മസാജ് ചെയ്തു തരുമോ? മരുന്നെടുത്തു തരുമോ? അങ്ങനെ കുറച്ചു കാര്യങ്ങൾ! ഞാൻ കട്ടിലിൽ ഇരുന്ന് അവളുടെ തല മസാജ് ചെയ്തു കൊടുത്തു. കുറച്ചധികനേരം അതു ചെയ്യാമോ എന്നായിരുന്നു അവളുടെ അഭ്യർത്ഥന. ഉറക്കത്തിനിടയിലും എന്റെ മസാജിനെക്കുറിച്ച് അവൾ നല്ല കമന്റുകൾ നൽകിക്കൊണ്ടിരുന്നു.
പിന്നെയാണ് അവൾക്ക് ഓർമ വന്നത്, താഴത്തെ നിലയിൽ നിന്ന് അവളുടെ ഐ മാസ്ക് എടുത്തില്ല എന്ന്. അതൊന്നു എടുത്തു തരാമോ എന്നായി എന്നോടുള്ള അടുത്ത അഭ്യർത്ഥന. സത്യത്തിൽ ഞാനൊരു മടിച്ചിയാണ്. എനിക്കങ്ങനെ കുറെ കാര്യങ്ങൾ ചെയ്യാനൊന്നും ഇഷ്ടമല്ല. എന്നിട്ടും, ഞാൻ ഹൻസൂനോട് ഐ മാസ്ക് എടുത്തു തരാമെന്നേറ്റു. ഞാൻ വാതിൽക്കൽ എത്തിയതും, പാതി മയക്കത്തിൽ ഹൻസു എന്നോടു പറഞ്ഞു, 'അമ്മൂ, എനിക്കറിയാം... ഞാൻ നിന്നോടു കുറെ കാര്യങ്ങൾ ഇങ്ങനെ ചോദിക്കുന്നു എന്ന്. പക്ഷേ, ഒരു ദിവസം ഇതെല്ലാം ഞാൻ തിരിച്ചു ചെയ്തു തരാം... കേട്ടോ!' - അവളുടെ വാക്കുകൾ എന്റെ ഹൃദയം തകർത്തു. നുറുങ്ങിയ ഹൃദയം ചേർത്തുപിടിച്ച് ഞാൻ പോയി അവളുടെ ഐ മാസ്ക് എടുത്തു കൊണ്ടു വന്നു– മധുര സ്വപ്നങ്ങൾ എന്നായിരുന്നു അതിൽ എഴുതിയിരുന്നത്!
തിയറ്ററുകളിൽ പ്രദർശനം തുടരുന്ന ലൂക്കയിൽ അഹാനയുടെ കുട്ടിക്കാലം അവതരിപ്പിച്ചത് ഹൻസികയായിരുന്നു. അഹാനയ്ക്കൊപ്പം ഹൻസികയുടെ അഭിനയവും പ്രേക്ഷകശ്രദ്ധ നേടിയിരുന്നു.