രണ്ടിലൊരാൾ വിവാഹം കഴിക്കാതെ ഒന്നും അവസാനിക്കില്ല: പ്രഭാസ്
Mail This Article
നടി അനുഷ്ക ഷെട്ടിയുമായി പ്രണയത്തിലാണെന്നും വിവാഹിതനാകുമെന്നുമുള്ള വാര്ത്തകള് തള്ളി നടന് പ്രഭാസ്. ബാഹുബലിക്ക് ശേഷം പ്രഭാസ് നായകനാകുന്ന സാഹോ എന്ന ബിഗ് ബജറ്റ് ചിത്രത്തിന്റെ പ്രചാരണാര്ഥം കൊച്ചിയിലെത്തിയതായിരുന്നു പ്രഭാസ് . മുന്നൂറ്റിയമ്പത് കോടിരൂപ ചെലവില് നിര്മിച്ച ചിത്രം 30ന് തിയറ്ററുകളിലെത്തും.
ഒാണ്ലൈന് മാധ്യമങ്ങളില് കാലങ്ങളായി പ്രചരിക്കുന്ന ഗോസിപ്പുകള് െവറും ഗോസിപ്പായി മാറ്റിനിര്ത്തിയാണ് പ്രഭാസ് അനുഷ്കയുമായുള്ള ബന്ധത്തെക്കുറിച്ച് തുറന്നുപറഞ്ഞത്. താനും അനുഷ്കയും പതിനൊന്ന് വര്ഷമായി സുഹൃത്തുക്കളാണ്. ബാഹുബലിയിലെ പ്രധാന കഥാപാത്രമായിരുന്നു ദേവസേന . ബാഹുബലി ഏറ്റവും അധികമാളുകള് ഇഷ്ടപ്പെട്ട കഥാപാത്രവും. അനുഷ്കയും താനും വിവാഹിതരാകാത്തതുകൊണ്ടുമാത്രമുണ്ടായ ഗോസിപ്പുകളാണത്. വിവാഹിതരാകാന് താല്പര്യമുണ്ടായിരുന്നെങ്കില് അത് ഒളിച്ചുവയ്ക്കാനോ ഭയപ്പെടേണ്ട കാര്യമോ തനിക്കില്ല. രണ്ടിലൊരാള് വിവാഹം കഴിക്കാതെ ഗോസിപ്പുകള് അവസാനിക്കില്ലെന്നും പ്രഭാസ് പറഞ്ഞു.