ആ ലൈക്ക് അബദ്ധം പറ്റിയത്: സമരത്തെ അനുകൂലിക്കുന്നില്ലെന്ന് അക്ഷയ് കുമാര്‍
Mail This Article
പൗരത്വ ഭേദഗതി നിയമത്തിനെതിരെ ജാമിയ മിലിയ, അലിഗഡ് സർവകലാശാലകളിലെ വിദ്യാർഥികൾ നടത്തുന്ന സമരത്തോട് തനിക്ക് യോജിപ്പില്ലെന്ന് അക്ഷയ് കുമാര്‍. ട്വിറ്ററില്‍ വിദ്യാര്‍ഥികളുടെ സമരത്തെക്കുറിച്ചുള്ള ഒരു പോസ്റ്റിനുതാഴെ താന്‍ ലൈക്ക് ചെയ്തത് അറിയാതെ സംഭവിച്ചതാണെന്നും ‘അബദ്ധം’ മനസിലായ ഉടൻ തിരുത്തിയെന്നും അക്ഷയ് കുമാര്‍ ട്വീറ്റ് ചെയ്തു.
‘ജാമിയ മിലിയ വിദ്യാര്‍ഥികളുടെ ട്വീറ്റിന് ലൈക്ക് ചെയ്തതിനെക്കുറിച്ച്, അത് അബദ്ധത്തില്‍ സംഭവിച്ചതാണ്. സ്‌ക്രോള്‍ ചെയ്യുമ്പോള്‍ അബദ്ധത്തില്‍ ലൈക്ക് ബട്ടണ്‍ ഞെക്കിയതാവും. അത് മനസിലാക്കിയപ്പോള്‍ പെട്ടെന്നുതന്നെ ആ ട്വീറ്റ് ഞാന്‍ അണ്‍ലൈക്ക് ചെയ്യുകയുമുണ്ടായി. അത്തരം നടപടികളെ ഒരുതരത്തിലും ഞാന്‍ അനുകൂലിക്കുന്നില്ല’, അക്ഷയ് കുമാര്‍ ട്വീറ്റ് ചെയ്തു.
പൗരത്വ ഭേദഗതി നിയമത്തെക്കുറിച്ച് സിനിമാരംഗത്തുനിന്നും വളരെ കുറച്ചുപേര്‍ മാത്രമാണ് ഇതുവരെ പ്രതികരിച്ചിട്ടുള്ളത്. സംവിധായകന്‍ അനുരാഗ് കാശ്യപ് നിയമത്തിലുള്ള തന്റെ എതിര്‍പ്പ് രേഖപ്പെടുത്തിയിരുന്നു. ഇനി നിശബ്ദനായിരിക്കാന്‍ കഴിയില്ലെന്നും ഈ സര്‍ക്കാര്‍ ഫാസിസ്റ്റ് ആണെന്നും അനുരാഗ് ട്വിറ്ററില്‍ കുറിച്ചു.
പൊലീസ് അതിക്രമത്തിനെതിരെ പ്രതികരിച്ച് നടി പാര്‍വതി തിരുവോത്തും രംഗത്തുവന്നു. മാധ്യമ പ്രവര്‍ത്തക റാണ അയ്യൂബ് പങ്കുവെച്ച വിഡിയോ റീട്വീറ്റ് ചെയ്ത് ‘ജാമിയ ആന്‍ഡ് അലിഗഡ്.. തീവ്രവാദം!’ എന്ന് താരം ട്വീറ്റ് ചെയ്തു. അലിഗഡിലെ വിദ്യാര്‍ഥികള്‍ക്ക് നേരെ ഗ്രനേഡ് പ്രയോഗിക്കുന്ന പൊലീസുകാരുടെ വിഡിയോ ആണ് റാണ അയ്യൂബ് പങ്കുവെച്ചിരിക്കുന്നത്.
നേരത്തെ പൗരത്വ ബില്ലിനെതിരെയും പാര്‍വതി രംഗത്തെത്തിയിരുന്നു. നട്ടെല്ലിലൂടെ ഭയം കയറുന്നുണ്ട്, നമ്മള്‍ ഇത് സംഭവിക്കാന്‍ അനുവദിക്കരുത് എന്നായിരുന്നു പ്രതികരണം.
