കോവിഡ് കാലത്തെ ആദ്യ ചിത്രമാകാൻ 'ലവ്'; ഫസ്റ്റ്ലുക്ക് പോസ്റ്ററിൽ രജിഷയും ഷൈനും

ഈ കൊറോണക്കാലത്തു  ഷൂട്ടിംഗ്  ആരംഭിച്ചു അവസാനിച്ച ലോകത്തിലെ തന്നെ ഒരേയൊരു ചിത്രമെന്ന പ്രത്യേകതയുമായി എത്തുന്ന ഷൈൻ ടോം ചാക്കോ നായകനാകുന്ന സിനിമയ്ക്കു  'ലവ് ' എന്ന് പേരിട്ടു . അനുരാഗ കരിക്കിൻ വെള്ളം, ഉണ്ട എന്നീ സിനിമകൾ സംവിധാനം ചെയ്ത ഖാലിദ് റഹ്മാൻ ഒരുക്കുന്ന ചിത്രം നിർമിക്കുന്നത് അഞ്ചാം പാതിരയുടെ നിർമാതാവ് ആഷിഖ് ഉസ്മാനാണ്.

രജിഷ വിജയൻ നായികയാകുന്ന ചിത്രത്തിന്റെ ഛായാഗ്രഹണം നിര്‍വഹിച്ചിരിക്കുന്നത് ജിംഷി ഖാലിദാണ്. കോവിഡ് മാനദണ്ഡങ്ങൾ എല്ലാം പാലിച്ചു ഒരുക്കിയ ചിത്രത്തിന്റെ ഷൂട്ടിംഗ് ജൂൺ 22 -നാണു ആരംഭിച്ചത്. ജൂലൈ 15 ന് ചിത്രീകരണം അവസാനിക്കുകയും ചെയ്തു. വീണ നന്ദകുമാർ, ജോണി ആന്റണി, സുധി കോപ്പ തുടങ്ങിയവരും ചിത്രത്തിൽ പ്രധാന വേഷങ്ങളിൽ എത്തുന്നുണ്ട്.

നൗഫൽ അബ്ദുള്ളയാണ് എഡിറ്റിംഗ് നിർവഹിക്കുന്നത്. ചിത്രം ഓ ടി ടി പ്ലാറ്റുഫോമുകളിൽ റിലീസ് ചെയ്യാനാണ് അണിയറ പ്രവർത്തകർ ആലോചിക്കുന്നത്.