നോട്ടുനിരോധനവും ഡിജിറ്റൽ പണമിടപാടും ദൃശ്യം 2–ന്റെ വിജയത്തിനു കാരണം: സന്ദീപ് വാര്യർ

ദൃശ്യം 2–ന്റെ വിജയത്തിനു കാരണം നോട്ടുനിരോധനവും വർധിച്ച ഡിജിറ്റൽ പണമിടപാടുമാണെന്ന് ബിജെപി നേതാവ് സന്ദീപ് വാര്യർ. ദൃശ്യത്തിന്റെ വിജയത്തെക്കുറിച്ച് പങ്കു വച്ച് കുറിപ്പിലാണ് സന്ദീപ് ഇക്കാര്യം പറഞ്ഞിരിക്കുന്നത്. 

‘ലാലേട്ടാ ദൃശ്യം 2 കണ്ടു. ഗംഭീരം . ആദ്യ സിനിമ പോലെ തന്നെ സസ്പെൻസ് നിലനിർത്താൻ കഴിഞ്ഞിരിക്കുന്നു. അഭിനന്ദനങ്ങൾ. മലയാള സിനിമ പുതിയൊരു നോർമലിലേക്ക് വിജയകരമായി കടന്നിരിക്കുകയാണ്. ഒ.ടി.ടി പ്ലാറ്റ് ഫോം വഴി റിലീസിംഗിന് ഇനി കൂടുതൽ സിനിമകളെത്തും . ഡിജിറ്റൽ ഇന്ത്യക്ക് നന്ദി. ഡിജിറ്റൽ ബാങ്കിംഗ് ട്രാൻസാക്ഷനിലെ വർദ്ധനവുണ്ടായിരുന്നില്ലെങ്കിൽ ഒ.ടി.ടി റിലീസിംഗ് ജനകീയവും വിജയവുമാകുമായിരുന്നില്ല. 2016ലെ ഡിമോണിറ്റൈസേഷൻ, കോവിഡ് മഹാമാരിയുടെ കാലത്തും ഇന്ത്യയുടെ സാമ്പത്തിക രംഗത്തെ സജീവമാക്കി നിർത്താൻ സഹായിച്ചതിന്റെ നേർസാക്ഷ്യമാണ് ദൃശ്യം 2 ഒ.ടി.ടി റിലീസിങ്.’ സന്ദീപ് പറയുന്നു. 

ഇന്നലെ റിലീസായ ദൃശ്യം 2–ന് സമൂഹമാധ്യമങ്ങളിൽ വലിയ സ്വീകരണമാണ് ലഭിക്കുന്നത്. സിനിമ കണ്ട മിക്കവരും അതിഗംഭീരമെന്ന അഭിപ്രായമാണ് പ്രകടിപ്പിക്കുന്നത്.