അലി അക്ബറിന്റെ വാരിയംകുന്നത്ത് അഹമ്മദ് ഹാജിയാകുന്നത് തലൈവാസൽ വിജയ്

1921ലെ മലബാർ കലാപത്തെ ആസ്പദമാക്കി സംവിധായകൻ അലി അക്ബർ ഒരുക്കുന്ന ചിത്രത്തിൽ വാരിയംകുന്നത്ത് കുഞ്ഞഹമ്മദ് ഹാജിയാവുന്നത് തമിഴ്, മലയാളം ചലച്ചിത്രതാരം തലൈവാസൽ വിജയ്. അലി അക്ബർ തന്നെയാണ് ഇക്കാര്യം പുറത്തുവിട്ടത്. വയനാട്ടിലാണ് നിലവിൽ ചിത്രത്തിന്റെ ഷൂട്ടിങ് നടക്കുന്നത്. 30 ദിവസം നീണ്ടതാണ് വയനാട്ടിലെ ആദ്യ ഷെഡ്യൂൾ.

ജനങ്ങളിൽനിന്ന് പിരിച്ചെടുത്ത പണമുപയോഗിച്ചാണ് സിനിമ നിർമിക്കുന്നത്. ഈ സ്വപ്നപ്രൊജക്റ്റ് യാഥാർഥ്യമാക്കാൻ തെരുവിലിറങ്ങി ഭിക്ഷ യാചിക്കാൻപോലും താൻ തയാറാണെന്ന് അലി അക്ബർ പറഞ്ഞിരുന്നു. തന്റെ കരിയറിലെ ഏറ്റവും പ്രധാനപ്പെട്ട സിനിമയാണ് ‘1921: പുഴ മുതൽ പുഴവരെ’ എന്നും ഇത്തരമൊരു കഥാപാത്രം ചെയ്യാൻ ഏറെ താൽപര്യമുണ്ടെന്നും തലൈവാസൽ വിജയ് പറഞ്ഞു.‌