13 വർഷത്തെ ഇടവേളയിൽ എടുത്ത ഫോട്ടോ; സുഹാസിനിയുടെ പ്രായം പുറകോട്ടെന്ന് ആരാധകർ

13 വർഷത്തെ ഇടവേളയിൽ എടുത്ത രണ്ടു ചിത്രങ്ങൾ പങ്കുവച്ച് നടിയും സംവിധായികയുമായ സുഹാസിനി. വർഷങ്ങൾക്ക് മുൻപ് െബംഗലൂരിൽ ഒരു സിനിമയുടെ ഷൂട്ടിനിടയിൽ എടുത്ത ചിത്രവും അതേ സാരിയിൽ ഈ അടുത്ത് എടുത്ത മറ്റൊരു ചിത്രവുമാണ് സുഹാസിനി പങ്കുവച്ചത്. 

‘നിങ്ങൾക്ക് ഇത് വിശ്വസിക്കാനാകുമോ! 13 വർഷത്തെ ഇടവേളയിൽ എടുത്തതാണ് ഈ ചിത്രങ്ങൾ. ആദ്യത്തേത് ബാംഗ്ലൂരിൽ ‘എരട്നെ മധുവേ’ എന്ന ചിത്രത്തിന് വേണ്ടിയായിരുന്നു. ഇന്ന് ഞങ്ങൾ ഷൂട്ടിന് വേണ്ടി അതെ സാരി തന്നെ ഉപയോഗിച്ചു. സാരിയോ മോഡലോ ഫോട്ടോഗ്രാഫറോ ഒറിജിനലുമായി പൊരുത്തപ്പെടുത്താൻ ഞങ്ങൾക്ക് കഴിഞ്ഞില്ല, പക്ഷേ ഈ ഫോട്ടോ ഒരുപാട് സന്തോഷം നൽകുന്നു. നന്ദി ആസ്ത, ഈ കൊളാഷിന്.’–സുഹാസിനി കുറിച്ചു.

നിരവധി ആരാധകരാണ് ചിത്രത്തിന് കമന്റുകളുമായി എത്തിയത്. ‘വര്‍ഷങ്ങള്‍ കടന്നുപോയി, പക്ഷേ ഇപ്പോഴും നിങ്ങള്‍ക്ക് അതേ ഭംഗിയാണ്, അന്നും ഇന്നും എന്നും സുന്ദരമാണ് നിങ്ങളുടെ അഴകേറിയ ചിരി’ , ‘എന്താണ് പ്രായം പുറകോട്ടാക്കുന്ന ഈ മാജിക്’....എന്നിങ്ങനെ പോകുന്നു പ്രതികരണങ്ങൾ.