മേജർ സന്ദീപ് ഉണ്ണികൃഷ്ണന്റെ കഥ പറയുന്ന ‘മേജർ’; ട്രെയിലർ
Mail This Article
മുബൈ ഭീകരാക്രമണത്തില് വീരമൃത്യു വരിച്ച മലയാളി മേജര് സന്ദീപ് ഉണ്ണികൃഷ്ണന്റെ ജീവിതം വെള്ളിത്തിരയിലേക്ക്. മേജര് എന്നാണ് ചിത്രത്തിന്റെ പേര്. നടന് മഹേഷ് ബാബുവിന്റെ ഉടമസ്ഥതയിലുള്ള ജി.മഹേഷ് ബാബു എന്റര്ടെയ്ന്മെന്റുമായി ചേര്ന്ന് സോണി പിക്ചേഴ്സ് ഇന്റര്നാഷനല് പ്രൊഡക്ഷന്സ് ചിത്രം നിർമിക്കുന്നു. ഹിന്ദി, തെലുങ്ക്, കന്നഡ, മലയാളം ഭാഷകളിലാണ് ചിത്രമൊരുങ്ങുന്നത്.
തെലുങ്ക് നടനും സംവിധായകനും തിരക്കഥാകൃത്തുമായ അദിവി സേഷ് ആണ് മേജര് സന്ദീപ് ഉണ്ണികൃഷ്ണന്റെ റോളിലെത്തുന്നത്. ഗൂഢാചാരി എന്ന സിനിമയിലൂടെ ശ്രദ്ധേയനാണ് അദിവി. 'ഗൂഡാചാരി' ഫെയിം സാഷി കിരൺ ടിക്കയാണ് സിനിമ സംവിധാനം ചെയ്യുന്നത്. അദിവി സേഷ് തന്നെയാണ് തിരക്കഥയൊരുക്കുന്നതും.
ശോഭിത ധൂലിപാല, സെയ് മഞ്ജരേക്കര്, പ്രകാശ് രാജ്, രേവതി എന്നിവര് പ്രധാന കഥാപാത്രങ്ങളെ അവതരിപ്പിക്കുന്നു. അദിവി സേഷിന്റെ അദിവി എന്റര്ടെയ്ന്മെന്റും ശരത് ചന്ദ്ര, അനുരാഗ് റെഡ്ഡി എന്നിവരുടെ എ പ്ലസ് എസ് മൂവീസും ‘മേജറി’ന്റെ നിര്മാണ പങ്കാളികളാണ്.
മുംബൈ താജ് ഹോട്ടല് കേന്ദ്രീകരിച്ച് 2008 നവംബര് 26ന് നടന്ന ഭീകരാക്രമണത്തിലാണ് മേജര് സന്ദീപ് ഉണ്ണികൃഷ്ണന് കൊല്ലപ്പെടുന്നത്. എന്.എസ്.ജി കമാന്ഡോ ആയിരുന്ന അദ്ദേഹത്തിന്റെ സംഭാവനകള്ക്കുള്ള ആദരവെന്ന നിലയില് മരണശേഷം 2009ല് ഭാരത സര്ക്കാര് പരമോന്നത സൈനിക ബഹുമതിയായ അശോക ചക്ര സമ്മാനിച്ചിരുന്നു.