കുറേ കുശുമ്പും, പുച്ഛവും: ഈ ചായ ഉണ്ടാക്കിയത് ഞാൻ: ഗോൾഡ് വിമർശനങ്ങളിൽ അൽഫോൻസ് പുത്രൻ

alphonse-gold
SHARE

‘ഗോൾഡ്’ സിനിമയ്ക്കു ലഭിക്കുന്ന വിമർശനങ്ങളോടു പ്രതികരിച്ച് സംവിധായകൻ അൽഫോൻസ് പുത്രൻ. നെഗറ്റീവ് റിവ്യൂ എഴുതുന്നവരോടു നന്ദിയുണ്ടെന്നും കുറേ കുശുമ്പും പുച്ഛവുമാണ് അതിലധികവുമെന്നും അൽഫോൻസ് പറയുന്നു.

അൽഫോൻസ് പുത്രന്റെ വാക്കുകൾ:

ഗോൾഡിനെ കുറിച്ചുള്ള ....നെഗറ്റീവ് റിവ്യൂസ് എല്ലാവരും കാണണം. കുറേ കുശുമ്പും പുച്ഛവും തേപ്പും എല്ലാം എന്നെക്കുറിച്ചും എന്റെ സിനിമയെ കുറിച്ചും കേൾക്കാം. അത് കേൾക്കുമ്പോൾ കിട്ടുന്ന ഒരു സുഖം ഉണ്ടല്ലോ.... എന്റെ പ്രത്യേക നന്ദി നെഗറ്റീവ് റിവ്യൂസ് എഴുതുന്നവർക്ക്.

ചായ കൊള്ളൂല്ല എന്ന് പെട്ടെന്നു പറയാം ! കടുപ്പം കൂടിയോ കുറഞ്ഞോ? വെള്ളം കൂടിയോ കുറഞ്ഞോ? പാല് കൂടിയോ കുറഞ്ഞോ? പാല് കേടായോ കരിഞ്ഞോ? മധുരം കൂടി, മധുരം കുറഞ്ഞു എന്നു പറഞ്ഞാൽ ചായ ഉണ്ടാക്കുന്ന ആൾക്ക് അടുത്ത ചായ ഉണ്ടാക്കുമ്പോൾ ഉപകരിക്കും. അയ്യേ ഊള ചായ, വൃത്തികെട്ട ചായ, വായില്‍ വയ്ക്കാൻ കൊള്ളാത്ത ചായ എന്ന് പറഞ്ഞാൽ നിങ്ങളുടെ ഈഗോ വിജയിക്കും. ഇതുകൊണ്ടു രണ്ടു പേർക്കും ഉപയോഗം ഇല്ല. നേരം 2 , പ്രേമം 2 എന്നല്ല ഞാൻ ഈ സിനിമയ്ക്കു പേരിട്ടത്. ഗോൾഡ് എന്നാണ്. ഞാനും ഈ സിനിമയിൽ പ്രവർത്തിച്ച ആരും നിങ്ങളെ വെറുപ്പിക്കാനോ ഉപദ്രവിക്കാനോ നിങ്ങളുടെ വിലപ്പെട്ട സമയം കളയാനോ ചെയ്തതല്ല ഈ സിനിമ. ഇനിയും എന്നെയും എന്റെ ടീമിനെയും സംശയിക്കരുത്.

NOTE : ഗോൾഡ് അങ്ങനെ എടുക്കാമായിരുന്നു ഇങ്ങനെ എടുക്കാമായിരുന്നു എന്ന് പറയരുത്. കാരണം ഞാനും ഗോൾഡ് എന്ന സിനിമ ആദ്യമായിട്ടാണ് എടുക്കുന്നത്. നേരത്തേ ഗോൾഡ് ചെയ്തു ശീലം ഉണ്ടെങ്കിൽ നിങ്ങൾ പറയുന്നത് ശരിയാണ്.

എന്ന് നിങ്ങളുടെ സ്വന്തം അൽഫോൻസ് പുത്രൻ.

അല്‍ഫോൻസിന്റെ കുറിപ്പിനു താഴെ വലിയ രീതിയിലുള്ള പ്രതികരണമാണ് ആളുകളിൽനിന്നു ലഭിക്കുന്നത്. ടിക്കറ്റ് എടുത്ത് സിനിമ കാണുന്നവര്‍ക്ക് അഭിപ്രായം പറയാൻ അവകാശമുണ്ടെന്നും അതിൽ യാതൊരു തരത്തിലുമുള്ള ഈഗോയും ഇല്ലെന്നുമാണ് ഇവർ പറയുന്നത്. ചിലരുടെ കമന്റുകൾക്ക് അൽഫോൻസും മറുപടി കൊടുക്കുന്നുണ്ട്.

വിമർശകന്റെ ചോദ്യം: കാശ് കൊടുത്തു വാങ്ങിയ ചായ വായിൽ വയ്ക്കാൻ കൊള്ളില്ല എങ്കിൽ എന്തു ചെയ്യണം ? മിണ്ടാതെ ഉരിയാടാതെ കാശും കൊടുത്ത് പോകണം എന്നാണോ? അതും നന്നായി ചായ ഉണ്ടാക്കുന്ന ആളുടെ സ്പെഷൽ ചായ കാലങ്ങൾക്കു ശേഷം കിട്ടുന്നു എന്ന് കേട്ട് കുടിക്കാൻ പോകുമ്പോൾ ! പോട്ടെ ഒരു മറുപടി തരാമോ ? നയൻതാരയെ എന്തുപറഞ്ഞ് ആണ് കൺവിൻസ് ചെയ്തത് ?

അൽഫോൻസ് പുത്രന്റെ മറുപടി: ഈ ചായ ഉണ്ടാക്കിയത് ഞാൻ അല്ലേ. നിങ്ങൾക്ക് എന്നോടു പറയാൻ പാടില്ലേ? അത് മൈക്ക് വച്ച് വിളിച്ചു പറയണോ എന്നുള്ളത് നിങ്ങളുടെ വ്യക്തിസ്വാതന്ത്ര്യം. നയൻതാര അവതരിപ്പിക്കുന്ന സുമംഗലി എന്ന കഥാപാത്രത്തിന്റെ പ്രാധാന്യം. ജോഷിയുടെ ഷോപ് ഇരിക്കുന്ന സുമംഗലി ഷോപ്പിങ് കോംപ്ലെക്സിന്റെ ഓണർ ആരാണ്? ജോഷിയുടെ വീട്ടിൽ ആർക്കു വേണ്ടി ആര് കൊടുത്ത സ്വർണം ആണ് ബ്രോ ? അതാണ് പ്രാധാന്യം.

ചോദ്യം: ഗോൾഡിന് ഉണ്ടായ ഒരേ ഒരു ഗുണം താങ്കൾ മലയാളത്തിൽ ടൈപ്പ് ചെയ്യാൻ പഠിച്ചു എന്നത് മാത്രമാണ്. എന്ന്... ആദ്യദിനം ആദ്യ ഷോ കണ്ട് എഡിറ്റിങ് പഠിക്കാത്ത ഒരു സാധാരണ സിനിമാ പ്രേമി.

അൽഫോൻസിന്റെ മറുപടി: എഡിറ്റിങ് പഠിച്ചിട്ടു സിനിമയെ കുറിച്ച് റിവ്യൂ പറയണം എന്ന് പറഞ്ഞത് ഞാനല്ല ബ്രോ. ഞാൻ മലയാളത്തിൽ പണ്ടേ എഴുതാറുണ്ട്. അത് നിങ്ങൾ ശ്രദ്ധിക്കാത്തതുകൊണ്ടു തോന്നുന്നതാണ്.

ചോദ്യം: ഒരു തവണ കാണാൻ പറ്റുന്ന ശരാശരി സിനിമ

അൽഫോൻസിന്റെ മറുപടി: ഒരു പ്രാവശ്യം കുടിക്കാൻ പറ്റുന്ന ചായ.

തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
Video

ധ്യാനും വിനീതും ഒരേപോലെയാണ്... 

MORE VIDEOS