‘കൈതി 2’വിനു മുമ്പ് ‘സർദാർ 2’; ബ്രഹ്മാണ്ഡ ടീസർ

കാർത്തിയെ നായകനാക്കി പി.എസ്. മിത്രൻ സംവിധാനം ചെയ്യുന്ന സ്പൈ ആക്‌ഷൻ ത്രില്ലർ ‘സർദാർ 2’ ആദ്യ ഗ്ലിംപ്സ് എത്തി. ഹോളിവുഡ്–കൊറിയൻ സിനിമകളെ അനുസ്മരിപ്പിക്കുന്ന വിധത്തിലുള്ള ഷോട്ടുകളുമായാണ് ടീസർ എത്തിയിരിക്കുന്നത്. ജപ്പാനിൽ ഒരു മിഷനു പോകുന്ന സർദാറിനെ ടീസറിൽ കാണാം.

ഇന്ത്യയെ നശിപ്പിക്കാൻ പോകുന്ന ബ്ലാക്ക് ഡാഗർ എന്നൊരു ശക്തി വരുന്നുവെന്ന സൂചനയും ടീസർ നൽകുന്നു. എസ്‍.ജെ. സൂര്യ, മാളവിക മോഹനൻ, അഷിക രംഗനാഥ്, രജിഷ വിജയൻ, യോഗി ബാബു, ബാബു ആന്റണി എന്നിവരാണ് പ്രധാന അഭിനേതാക്കൾ.

2022ൽ റിലീസ് ചെയ്ത ‘സർദാർ’ സിനിമയുടെ സീക്വൽ ആയാണ് രണ്ടാം ഭാഗം എത്തുക. സാം സി.എസ്. ആണ് സംഗീതം. ജോർജ് സി. വില്യംസ് ആണ് ഛായാഗ്രഹണം. മേയ് 30ന് ചിത്രം തിയറ്ററുകളിലെത്തും.