ഭൂമിയിലെ സ്വർഗത്തിൽ ചോര വീണ ദിവസം, ഒരിക്കലും മാപ്പ് അർഹിക്കാത്ത ക്രൂരത: പഹല്‍ഗാം ഭീകരാക്രമണത്തില്‍ താരങ്ങൾ പറയുന്നു
Mail This Article
ജമ്മു കശ്മീരിലെ പഹല്‍ഗാമില്‍ നടന്ന ഭീകരാക്രമണത്തിൽ ദുഃഖം രേഖപ്പെടുത്തി മോഹൻലാൽ, മഞ്ജു വാരിയർ, പൃഥ്വിരാജ് അടക്കമുള്ള താരങ്ങൾ. ഭീകരാക്രമണത്തിന് ഇരയായവരെയോര്‍ത്ത് തന്റെ ഹൃദയം വേദനിക്കുന്നെന്നും നിരപരാധികളുടെ ജീവന്‍ അപഹരിക്കുന്നതിനെ ഒരു കാരണത്താലും ന്യായീകരിക്കാന്‍ കഴിയില്ലെന്നും മോഹന്‍ലാല്‍ പ്രതികരിച്ചു. ദുരിതബാധിതരായ കുടുംബങ്ങള്‍ ഇപ്പോള്‍ അനുഭവിക്കുന്ന വേദനയും ആഘാതവും സങ്കല്‍പ്പിക്കാന്‍ പോലും പ്രയാസമാണ്. പഹല്‍ഗാമില്‍ നഷ്ടപ്പെട്ട ധീരരായ ആത്മാക്കള്‍ക്ക് നീതി ലഭ്യമാക്കാന്‍ ഞങ്ങളുടെ സായുധ സേനയില്‍ പൂര്‍ണ വിശ്വാസമര്‍പ്പിക്കുന്നു എന്നാണ് മമ്മൂട്ടിയുടെ വാക്കുകൾ.
‘‘പഹല്‍ഗാം ഭീകരാക്രമണം തീര്‍ത്തും ഹൃദയ ഭേദകമാണ്. ഇത്തരം ദുരന്തങ്ങള്‍ക്ക് മുന്നില്‍ വാക്കുകള്‍ ഇല്ലാതാകുകയാണ്. ദുരിതബാധിതരായ കുടുംബങ്ങള്‍ ഇപ്പോള്‍ അനുഭവിക്കുന്ന വേദനയും ആഘാതവും സങ്കല്‍പ്പിക്കാന്‍ പോലും പ്രയാസമാണ്. രാജ്യം മുഴുവന്‍ അഗാധമായ ദുഃഖത്തിലാണ്. ദുഃഖത്തിലും ഐക്യദാര്‍ഢ്യത്തിലും ഒറ്റക്കെട്ടായി നില്‍ക്കുന്നു. ഞങ്ങള്‍ക്ക് നഷ്ടപ്പെട്ട ധീരരായ ആത്മാക്കള്‍ക്ക് നീതി ലഭ്യമാക്കാന്‍ ഞങ്ങളുടെ സായുധ സേനയില്‍ പൂര്‍ണ വിശ്വാസമര്‍പ്പിക്കുന്നു. അവരുടെ ത്യാഗം ഒരിക്കലും മറക്കില്ല.’’–മമ്മൂട്ടി പറയുന്നു.
‘‘പഹല്‍ഗാം ഭീകരാക്രമണത്തിന് ഇരയായവരെയോര്‍ത്ത് എന്റെ ഹൃദയം വേദനിക്കുന്നു. അത്തരം ക്രൂരതയ്ക്ക് സാക്ഷിയാകുന്നത് വേദനാജനകമാണ്. നിരപരാധികളുടെ ജീവന്‍ അപഹരിക്കുന്നതിനെ ഒരു കാരണത്താലും ന്യായീകരിക്കാന്‍ കഴിയില്ല. ഇരയാക്കപ്പെട്ടവരുടെ കുടുംബത്തിനുണ്ടായ നഷ്ടം വാക്കുകള്‍ക്ക് അതീതമാണ്. നിങ്ങള്‍ തനിച്ചല്ലെന്ന് ദയവായി അറിയുക. രാഷ്ട്രം മുഴുവന്‍ നിങ്ങളുടെ ദുഃഖത്തില്‍ പങ്കുചേരുന്നു. ഇരുട്ടിലും സമാധാനം നിലനില്‍ക്കുമെന്ന പ്രതീക്ഷ ഒരിക്കലും കൈവിടരുത്. പരസ്പരം കൈവിടാതെ നമുക്ക് ഒരുമിച്ച് നില്‍ക്കാം”. –മോഹന്‍ലാലിന്റെ വാക്കുകൾ.
‘‘ഇത് നമ്മെ എന്നെന്നേക്കുമായി വേട്ടയാടും. ഭീകരതയെ ന്യായീകരിക്കാൻ ഒന്നുമില്ല.’’–മഞ്ജു വാരിയർ കുറിച്ചു.
‘‘ഭൂമിയിലെ സ്വർഗത്തിൽ ചോര വീണ ദിവസം... ഒരിക്കലും മാപ്പ് അർഹിക്കാത്ത ക്രൂരത’’–അഭിലാഷ് പിള്ളയുടെ വാക്കുകൾ.
‘‘ഹൃദയം തകര്‍ന്നിരിക്കുന്നു. നിഷ്കളങ്കരായ പൗരന്മാരുടെ ജീവനെടുത്ത പഹല്‍ഗാമിലെ ഭയപ്പെടുത്തുന്ന ഭീകരാക്രമണം ഭീരുത്വത്തിന്‍റെ ഹിംസയല്ലാതെ മറ്റൊന്നുമല്ല. ഇത് ഇരകള്‍ക്ക് നേര്‍ക്ക് മാത്രമുള്ള ആക്രമണമല്ല, മറിച്ച് മനുഷ്യത്വത്തിന് നേര്‍ക്കുള്ള ഒന്നാണ്. പ്രിയപ്പെട്ടവരെ നഷ്ടപ്പെട്ട കുടുംബങ്ങളോട് ഞാന്‍ അഗാധമായി അനുശോചിക്കുന്നു.
ദുഃഖത്തിന്‍റെ ഈ വേളയില്‍ നിങ്ങളോടൊപ്പം ഞങ്ങള്‍ നില്‍ക്കുന്നു. ഈ ഹീനകൃത്യം നടത്തിയ ഭീരുക്കളോട്, നിങ്ങളുടെ ക്രൂരത മറക്കില്ല. നീതി നിങ്ങളെ തേടിയെത്തും.
ഈ രാജ്യം ഭയത്താല്‍ ഒരിക്കലും നിശബ്ദമാക്കപ്പെടില്ല. ഞങ്ങള്‍ ഒരുമിച്ച് നില്‍ക്കും. കൂടുതല്‍ ശക്തിയോടെ ഉയര്‍ത്തെഴുന്നേല്‍ക്കും. ആവശ്യമായത് ചെയ്യും എന്നതില്‍ പ്രധാനമന്ത്രിയിലും ആഭ്യന്തര മന്ത്രാലയത്തിലും വിശ്വാസമുണ്ട്. നീതി ഉണ്ടായേ തീരൂ. ജയ്‍ഹിന്ദ്.’’ ഉണ്ണി മുകുന്ദന്‍ സോഷ്യല്‍ മീഡിയയില്‍ കുറിച്ചു.
"ഒരിക്കൽ ഞാനും പഹൽഗാമിലെ ഒരു വിനോദസഞ്ചാരിയായിരുന്നു. ഭീകരാക്രമണത്തിൽ കൊല്ലപ്പെട്ടവരുടെ കുടുംബങ്ങളെ ഓർക്കുമ്പോൾ വേദനതോന്നുന്നു. ഇപ്പോഴത്തെ സംഭവത്തിനുശേഷം കൂടുതൽ നിരീക്ഷണത്തിനും സൂക്ഷ്മപരിശോധനയ്ക്കും വിധേയരാകുന്ന കശ്മീരിലെ പാവപ്പെട്ട ജനങ്ങളെ ഓർത്തും എന്റെ ഹൃദയം നുറുങ്ങുന്നു. നമ്മുടെ രാജ്യം കൂടുതൽ ധ്രുവീകരിക്കപ്പെടുന്ന ഈ സമയത്ത് ഒരു പ്രത്യേക മതത്തിനോ സമൂഹത്തിനോ എതിരെ വിദ്വേഷപ്രചരണം നടത്താതിരിക്കുന്നത് ഇന്ത്യയിലെ പൗരന്മാരെന്ന നിലയിൽ നമ്മുടെ കടമയാണ്.
എപ്പോഴും ഇത്തരത്തിലുള്ള അഭിപ്രായപ്രകടനങ്ങൾ നടത്തുന്ന ആളല്ല ഞാൻ എങ്കിലും ഇന്നിത് ഇവിടെ പറയണമെന്ന് തോന്നി. ഇത് വെറുപ്പ് പടർത്താനുള്ള സമയമല്ല, എന്റെ പോസ്റ്റിന്റെ കമന്റ്റ് സെക്ഷനിലോ നമ്മുടെ നാട്ടിലോ വിദ്വേഷപ്രചാരണങ്ങൾ നടത്താതിരിക്കുക," നടി ആൻഡ്രിയ പ്രതികരിച്ചു.
കശ്മീരിലെത്തുന്ന സഞ്ചാരികൾ ഒഴിവാക്കാത്ത വിനോ‍ദസഞ്ചാര കേന്ദ്രമാണു പഹൽഗാം. അമർനാഥ് തീർഥയാത്രയുടെ പരമ്പരാഗതപാതയുടെ തുടക്കവും ഇവിടെയാണ്. ഭീകരാക്രണത്തിൽ 27 പുരുഷൻമാരും ഒരു സ്ത്രീയും കൊല്ലപ്പെട്ടു എന്നാണ് റിപ്പോർട്ട്. ആക്രമണത്തില്‍ പരിക്കേറ്റ പത്തിലധികം പേർ ചികിത്സയിലുണ്ട്. ഇടപ്പള്ളി സ്വദേശി രാമചന്ദ്രനും ആക്രമണത്തിൽ കൊല്ലപ്പെട്ടിരുന്നു.