പ്രേമം സിനിമയിലെ മലരേ ഗാനത്തിന്റെ തെലുങ്ക് വിഡിയോ കഴിഞ്ഞ ദിവസം പുറത്തിറങ്ങിയിരുന്നു. ജോർജും മലരുമായി എത്തിയ നാഗചൈതന്യയുടെയും ശ്രുതിയുടെയും അഭിനയത്തെ വിമർശിച്ച് മലയാളി ആരാധകർ രംഗത്തെത്തുകയും ചെയ്തു.
നിവിനും സായി പല്ലവിയും മനോഹരമാക്കിയ ഈ രണ്ടുകഥാപാത്രങ്ങളെയും ഇരുവരും ചേർന്ന് നശിപ്പിച്ചെന്നായിരുന്നു ഇവരുടെ വാദം. മാത്രമല്ല രസകരായ ട്രോളുകളും പുറത്തിറങ്ങി. മലയാളികൾ മാത്രമല്ല തമിഴരുടെ അവസ്ഥയും ഇതുതന്നെയാണ്.
ഈ പാട്ടിനെ ഒരു ദുരന്തമായാണ് തമിഴർ അവതരിപ്പിച്ചിരിക്കുന്നത്. മലയാളികൾ പോസ്റ്ററുകളിലൂടെ ട്രോളിയെങ്കില്‍ ഇവർ വിഡിയോയിലൂടെയാണ് പാട്ടിനെ ട്രോളി കൊല്ലുന്നത്. പ്രേമം സിനിമ തമിഴ്നാട്ടിലും സൂപ്പർഹിറ്റായിരുന്നു. മലയാളികൾക്ക് മാത്രമല്ല തമിഴർക്കും ജോർജും മലരും മേരിയും സെലിനുമൊക്കെ പ്രിയപ്പെട്ടവരാണ്.
ഇവിടെ ഇത്രയും സ്വീകാര്യത ഉള്ളതുകൊണ്ട് മാത്രമാണ് ഈ സിനിമ തമിഴ് റീമേയ്ക്ക് ചെയ്യാൻ ആരും മുന്നിട്ടിറങ്ങാത്തതും. ഈ സിനിമ തമിഴിൽ റീമേയ്ക്ക് ചെയ്യാൻ അൽഫോൻസ് പുത്രന് മാത്രമേ സാധിക്കൂ എന്ന് സംവിധായകൻ സെൽവരാഘവൻ ട്വീറ്റ് ചെയ്തിരുന്നു.
തെലുങ്ക് പതിപ്പിലൂടെ ചിത്രത്തെ നശിപ്പിക്കുമെന്നാണ് ചിലരുടെ അഭിപ്രായം. പാട്ടിൽ തന്നെ ഇവരുടെ അഭിനയം ഇത്ര മോശമാണെങ്കിൽ സിനിമയിൽ എന്തായിരിക്കുമെന്ന് ഇക്കൂട്ടർ ചോദിക്കുന്നു.
പ്രേമം സിനിമയുടെ തെലുങ്ക് റീമേയ്ക്കിൽ മലരായി എത്തുന്ന ശ്രുതി ഹാസന്റെ ആദ്യലുക്ക് പുറത്തുവന്നപ്പോൾ ട്രോളോട് ട്രോളായിരുന്നു. സായി പല്ലവി മനോഹരമാക്കിയ കഥാപാത്രത്തെ ശ്രുതി നശിപ്പിക്കുമെന്ന് ട്രോളന്മാർ ഉറപ്പിച്ച് പറയുന്നു. ചിത്രീകരണം പൂർത്തിയാക്കി പ്രേമം തെലുങ്ക് ഇപ്പോൾ റിലീസിനൊരുങ്ങുകയാണ്.
