ഭാഷയുടെ അതിർവരമ്പുകൾ ഭേദിച്ച വിജയമായിരുന്നു ബാഹുബലിയുടേത്. റിലീസ് ചെയ്ത എല്ലാ ഭാഷകളിലും ചിത്രം സൂപ്പർഹിറ്റായി മാറി. തെലുങ്ക് സിനിമയുടെ ചരിത്രത്തിൽ തന്നെ ഇങ്ങനെയൊരു വിജയം ഇതാദ്യം. സംവിധായകൻ രാജമൗലിയുടെ വർഷങ്ങൾ നീണ്ട പരിശ്രമത്തിന്റെയും കഠിനാദ്ധ്വാനത്തിന്റെയും വിജയം കൂടിയായിരുന്നു ചിത്രത്തിന് ലഭിച്ച ഈ നേട്ടത്തിന് പ്രധാനകാരണം.
തെലുങ്കിൽ അല്ലാതെ മറ്റൊരു ഭാഷയിലും ഈ ചിത്രം നിർമിക്കാൻ ആഗ്രഹിച്ചിരുന്നില്ലെന്ന് രാജമൗലി പറഞ്ഞു. ഒരുപക്ഷേ ഇതൊരു ബോളിവുഡ് ചിത്രമായി ഒരുക്കാനാണ് തീരുമാനിച്ചതെങ്കിൽ ഈ ചിത്രം തന്നെ നടക്കുമായിരുന്നില്ല. രാജമൗലി പറയുന്നു.
ഈ സിനിമയുടെ തിരക്കഥയും ഷെഡ്യൂളും പൂർത്തിയായപ്പോൾ ആദ്യം മനസ്സിൽ തോന്നിയത് അഭിനേതാക്കളുടെ ഡേറ്റിന്റെ കാര്യമാണ്. ഏകദേശം രണ്ടുവർഷമെങ്കിലും അവർ ഈ ചിത്രത്തിന് വേണ്ടി മാറ്റിവെക്കേണ്ടതായി വരും. അങ്ങനെയുള്ള ഏതെങ്കിലും ബോളിവുഡ് താരങ്ങൾ ഇപ്പോഴുണ്ടോ? മറ്റൊരു ചിത്രത്തിനും കരാർ ഒപ്പിടാതെ രണ്ടുവർഷം ഒരു സിനിമയ്ക്ക് വേണ്ടി മാത്രം പ്രവർത്തിക്കുന്ന ആരുംതന്നെ ബോളിവുഡിൽ ഇല്ല. രാജമൗലി പറഞ്ഞു.