സങ്കൽപങ്ങളെ തകിടം മറിച്ച ‘തമാശ'; ‘കാണുമ്പോൾ നിന്നെ’ സ്നേഹം പടർത്തുന്നു
Mail This Article
ആസ്വാദക ഹൃദയത്തിലേക്ക് സ്നേഹത്തിന്റെ ഊഷ്മളത പൊഴിക്കുകയാണ് വിനയ് ഫോർട്ട് ചിത്രം ‘തമാശ’യിലെ ‘കാണുമ്പോൾ നിന്നെ’ എന്ന ഗാനം. മുഹ്സിൻ പരാരിയുടെ വരികൾക്കു റെക്സ് വിജയന്റെ സംഗീതം. ആശ ജീവനാണ് ഗാനം ആലപിച്ചിരിക്കുന്നത്.
ശ്രീനിവാസൻ മാഷുടെയും ചിന്നുവിന്റെയും സ്നേഹ സൗഹൃദങ്ങളാണ് ഗാനത്തിന്റെ പ്രമേയം. കൊച്ചിയിലെ കായലോരങ്ങളും ബിനാലെയും ദൃശ്യങ്ങളിൽ നിറയുന്നു. ഗാനത്തിന്റെ ലിറിക് വിഡിയോ നേരത്തെ തന്നെ ഏറെ ശ്രദ്ധ നേടിയതാണ്. ഇപ്പോൾ വിഡിയോയും ഏറ്റെടുത്തിരിക്കുകയാണ് ആരാധകർ.
തിയറ്ററിൽ മികച്ച പ്രതികരണം നേടി മുന്നേറുന്ന ചിത്രത്തിലെ ഗാനങ്ങളെല്ലാം സമൂഹമാധ്യമങ്ങളിൽ കയ്യടിനേടി. മലയാളത്തിലെ ‘സ്ലിംബ്യൂട്ടി’ നായികാ സങ്കൽപം മാറ്റിമറിച്ച സംവിധായകന്റെ നീക്കം പ്രശംസനീയമാണെന്നാണ് പ്രേക്ഷകരുടെ അഭിപ്രായം. പ്രതീക്ഷയും പ്രചോദനവും നൽകുന്ന സിനിമകളുടെ കൂട്ടത്തിൽപ്പെടും തമാശ എന്ന വിലയിരുത്തലും ഉണ്ട്.
റെക്സ് വിജയനെ കൂടാതെ ഷഹബാസ് അമനും ചിത്രത്തിനായി സംഗീതം നൽകി. നവാഗതനായ അഷറഫ് ഹംസയാണ് ചിത്രത്തിന്റെ സംവിധാനം. സമീർ താഹിർ, ലിജോ ജോസ് പെല്ലിശേരി, ഷൈജു ഖാലിദ്, ചെമ്പൻ വിനോദ് എന്നിവര് ചേർന്നാണ് നിർമാണം.