പൊന്നോണം ഇങ്ങെത്തി; നല്ലോണപ്പാട്ടുമായി മൂന്നാം ക്ലാസുകാരി

പൂവിളികളുടെ ഓണക്കാലമെത്തി. എങ്ങും ഓണപ്പാട്ടുകളും കൂടിച്ചേരലുകളുമാണ്. ഓണനാളിൽ മലയാള നാട്ടിലെത്തുന്ന ഓണത്തപ്പനെ കുട്ടിപ്പാട്ടുമായി വരവേൽക്കുകയാണ് മൂന്നാം ക്ലാസുകാരി ആൻ മരിയ ബിപിൻ. ബാല്യത്തിന്റെ നൈർമല്യമുള്ള 'പൊന്നോണ പൈങ്കിളി' എന്ന ഗാനം ഈ ഓണക്കാലത്ത് ശ്രദ്ധേയമാവുകയാണ്. 

ആൻ മരിയ ആലപിച്ചിരിക്കുന്ന ഓണപ്പാട്ടിന് സംഗീതം നൽകിയിരിക്കുന്നത് ടോംസണാണ്. ആന്റണി പി.ജെ ആലപ്പുഴയുടേതാണ് വരികൾ. നല്ലൊരു ഓണക്കാലത്തെ ഓർമപ്പെടുത്തുന്ന മനോഹരമായ ദൃശ്യങ്ങളും 'പൊന്നോണ പൈങ്കിളി' എന്ന ഗാനത്തെ മികച്ചൊരു കാഴ്ചാനുഭവമാക്കുന്നു. 

ഒരു കൂട്ടം പുതുമുഖങ്ങളാണ് വിഡിയോയുടെ അണിയറയിൽ പ്രവർത്തിച്ചിരിക്കുന്നത്. ഒരുപാടു കാലത്തെ ആഗ്രഹം ഈ ഓണക്കാലത്ത് പൂവണിഞ്ഞതിന്റെ സന്തോഷത്തിലാണ് അണിയറപ്രവർത്തകർ. നിർമാണം-ഇമ്മാനുവൽ, ക്യാമറ, എഡിറ്റ്– രാഹുൽ തങ്കച്ചൻ, ഓർക്കസ്ട്ര– ജോസഫ് ജോൺ ആൻഡ് ടീം.