‘എത്ര തവണ കണ്ടിട്ടും മതിവരുന്നില്ല’; ട്രെൻഡിങ്ങിൽ ഇടം പിടിച്ച് അയ്യപ്പനും കോശിയിലെ ഗാനം

പൃഥ്വിരാജും ബിജു മേനോനും ഒരുമിച്ച ‘അയ്യപ്പനും കോശിയും’ എന്ന ചിത്രത്തിലെ പുതിയ ഗാനം പുറത്തിറങ്ങി. ‘താളം പോയ് തപ്പും പോയ്’ എന്നു തുടങ്ങുന്ന വിഡിയോ ഗാനമാണ് അണിയറപ്രവർത്തകർ പുറത്തിറക്കിയത്. റഫീഖ് അഹമ്മദിന്റെ വരികൾക്ക് ജേക്സ് ബിജോയ് സംഗീതം പകർന്നിരിക്കുന്നു. 

‘താളം പോയ് തപ്പും പോയ് 

ഇന്ന് രാവിൻ ചാമ്പലടിഞ്ഞേ 

ആ ചാമ്പൽ കൂനേല് 

തീനാളം നീറിയെരിഞ്ഞേ...’...

നഞ്ചമ്മയും ജേക്സ് ബിജോയ്‍യും സംഗീതയും ചേർന്നാണ് ഗാനം ആലപിച്ചിരിക്കുന്നത്. പാട്ടിന്റെ ലിറിക്കൽ വിഡിയോ നേരത്തെ റിലീസ് ചെയ്തിരുന്നു. വരികളിലും ആലാപനശൈലിയിലും വ്യത്യസ്തത പുലർത്തുന്ന ഗാനം യൂട്യൂബ് ട്രെൻഡിങ്ങിൽ ഇടം പിടിച്ചു. അട്ടപ്പാടി സ്വദേശി നഞ്ചമ്മ വരികളെഴുതി ആലപിച്ച നാടൻ ശീലുള്ള ഗാനം ഏറെ ശ്രദ്ധിക്കപ്പെട്ടിരുന്നു.

അനാർക്കലിക്കു ശേഷം സച്ചി രചനയും സംവിധാനവും നിർവഹിച്ച ചിത്രമാണിത്. ഷാജു, ശ്രീധർ, രഞ്ജിത്ത്, സാബുമോൻ, അന്ന രേഷ്മ രാജൻ തുടങ്ങിയവരാണ് ചിത്രത്തിലെ മറ്റ് അഭിനേതാക്കൾ. സംവിധായകൻ രഞ്ജിത്തിന്റെ നേതൃത്വത്തിലുള്ള നിർമാണ വിതരണ കമ്പനിയായ ഗോൾഡ് കോയിൻ മോഷൻ പിക്ചേഴ്സ് ആണ് ചിത്രത്തിന്റെ നിർമാണം.