കെജിഎഫ് സംഗീത സംവിധായകന്‍ മലയാളത്തിലേയ്ക്ക്; അരങ്ങേറ്റം ഒമർ ലുലു ചിത്രത്തിലൂടെ
Mail This Article
കെജിഎഫിന്റെ സംഗീതസംവിധായകൻ രവി ഭാസുര്‍ ആദ്യമായി മലയാള ചിത്രത്തിനു വേണ്ടി സംഗീതമൊരുക്കുന്നു. ഒമർ ലുലു സംവിധാനം ചെയ്യുന്ന ‘പവർസ്റ്റാർ’ ആണ് രവി ഭാസുറിന്റെ അരങ്ങേറ്റ ചിത്രം. ഒമർ ലുലു തന്നെയാണ് ഇക്കാര്യം ഔദ്യോഗികമായി അറിയിച്ചത്. കെജിഎഫ് രണ്ടാം ഭാഗത്തിനു ശേഷം രവി ഭാസുര്‍ ഈണമൊരുക്കുന്ന ചിത്രമാണിത്.
ബാബു ആന്റണി കേന്ദ്രകഥാപാത്രത്തെ അവതരിപ്പിക്കുന്ന ചിത്രമാണ് ‘പവര്‍ സ്റ്റാര്‍’. വിര്‍ച്വല്‍ പ്രൊഡക്‌ഷന്‍സിന്റെ ബാനറില്‍ രതീഷ് ആനേടത്ത് നിർമിക്കുന്ന ചിത്രത്തിന്റെ തിരക്കഥ ഡെന്നിസ് ജോസഫിന്റേതാണ്. മലയാളത്തിലും കന്നടയിലുമായി ഒരുക്കുന്ന 'പവര്‍സ്റ്റാറിന്റെ ചിത്രീകരണം ഉടന്‍ ആരംഭിക്കുമെന്നാണ് റിപ്പോർട്ടുകൾ.
ബാബുരാജ്, റിയാസ് ഖാന്‍, അബു സലീം തുടങ്ങിയവര്‍ക്കൊപ്പം ഹോളിവുഡ് സൂപ്പര്‍ താരം ലൂയിസ് മാന്റിലോര്‍, അമേരിക്കന്‍ ബോക്‌സിങ് ഇതിഹാസം റോബര്‍ട്ട് പര്‍ഹാം, കന്നഡ യുവതാരം ശ്രേയസ് മഞ്ജു എന്നിവരും പവര്‍ സ്റ്റാറിൽ പ്രധാന കഥാപാത്രങ്ങളെ അവതരിപ്പിക്കുന്നു.
