പിന്നണി പാടി എം.ജി.ശ്രീകുമാറും ശ്രേയ ഘോഷാലും; മരക്കാറിലെ ‘ഇളവെയിൽ’ ശ്രദ്ധേയം
Mail This Article
മോഹൻലാൽ ചിത്രം ‘മരക്കാറി’ലെ പുതിയ ഗാനം പുറത്തിറങ്ങി. ‘ഇളവെയിൽ’ എന്നു തുടങ്ങുന്ന പാട്ടിന്റെ ലിറിക്കൽ വിഡിയോ ആണ് പ്രേക്ഷകർക്കരികിലെത്തിയത്. പ്രഭ വർമയുടെ വരികൾക്ക് റോണി റാഫേൽ ഈണം പകർന്നിരിക്കുന്നു. എം.ജി.ശ്രീകുമാറും ശ്രേയ ഘോഷാലും ചേർന്നാണ് ഗാനം ആലപിച്ചിരിക്കുന്നത്.
ചുരുങ്ങിയ സമയത്തിനകം ശ്രദ്ധേയമായ ‘ഇളവെയിൽ’ ഗാനം ഇതിനോടകം നിരവധി ആസ്വാദകരെയും സ്വന്തമാക്കിക്കഴിഞ്ഞു. മികച്ച പ്രേക്ഷക സ്വീകാര്യതയോടെ പാട്ട് ട്രെൻഡിങ്ങിൽ ഇടം നേടിയിരിക്കുകയാണ്. ചിത്രത്തിലെ ‘കണ്ണിൽ എന്റെ’ എന്നു തുടങ്ങുന്ന ആദ്യഗാനവും ഏറെ ശ്രദ്ധിക്കപ്പെട്ടിരുന്നു.
പ്രിയദർശന്റെ സംവിധാനത്തിലൊരുങ്ങുന്ന ബ്രഹ്മാണ്ഡ ചിത്രമാണ് ‘മരക്കാർ’. മോഹന്ലാലിനു പുറമേ മഞ്ജു വാരിയര്, അര്ജുന് സര്ജ, പ്രഭു, കീര്ത്തി സുരേഷ്, പ്രണവ് മോഹന്ലാല്, കല്യാണി പ്രിയദര്ശന്, സുഹാസിനി, സുനില് ഷെട്ടി, നെടുമുടി വേണു, ഫാസില് തുടങ്ങി വൻ താരനിര തന്നെ ചിത്രത്തില് അണിനിരക്കുന്നു. ഡിസംബർ 2ന് ‘മരക്കാർ’ പ്രദർശനത്തിനെത്തും.