‘അയ്യോ റിമിക്ക് ഇത്രയും പ്രായമോ’? അമ്പരന്ന് ആരാധകർ

യഥാർഥ പ്രായം വെളിപ്പെടുത്തി ഗായികയും അവതാരകയും അഭിനേത്രിയുമായ റിമി ടോമി. പ്രീഡിഗ്രി പഠനകാലത്ത് സംഗീതമത്സരത്തിൽ പങ്കെടുത്തതിന്റെ പത്രവാർത്തയുടെ ചിത്രം പങ്കിട്ടുകൊണ്ടുള്ള കുറിപ്പിലാണ് റിമി ടോമി തന്റെ ജനനത്തിയതി എഴുതിച്ചേർത്തത്. 

‘പ്രായം ഒരുപാട് കണക്കു കൂട്ടേണ്ട’ എന്നു കുറിച്ചുകൊണ്ടാണ് റിമി പ്രായം വെളിപ്പെടുത്തിയത്. 1983 സെപ്റ്റംബർ 22നാണ് റിമി ടോമി ജനിച്ചത്. 1999ൽ പ്രീഡിഗ്രി പഠനം പൂർത്തിയാക്കി. ആ കാലയളവിൽ പാലാ അൽഫോൻസ കോളജിലെ ഗായകസംഘത്തിനൊപ്പം നിൽക്കുന്നതിന്റെ ചിത്രമാണ് റിമി ടോമി ഇപ്പോൾ പങ്കുവച്ചിരിക്കുന്നത്. 

റിമിക്ക് 38 വയസ്സ് ഉണ്ടെന്നറിഞ്ഞ് അമ്പരന്നിരിക്കുകയാണ് ആരാധകർ. ‘അയ്യോ റിമിക്ക് ഇത്രയും പ്രായമോ’ എന്നാണ് ചിലരുടെ ചോദ്യം. കാഴ്ചയിൽ റിമി ഇപ്പോഴും ഇരുപതുകാരിയാണെന്നും ചർമം കണ്ടാൽ പ്രായം തോന്നില്ലെന്നും ആരാധകർ കുറിച്ചു. മുൻപും റിമി ടോമിയുടെ പ്രായം സംബന്ധിച്ച് ചർച്ചകൾ ഉണ്ടായിട്ടുണ്ട്. ഇപ്പോഴും റിമി ചെറുപ്പമായിരിക്കുന്നതിന്റെ രഹസ്യമാണു പലർക്കും അറിയേണ്ടത്. 

ഗായിക ശരീരഭാരം കുറച്ചതെങ്ങനെയെന്നും ആരാധകരിൽ ചിലർ അന്വേഷിച്ചു. ആഹാരപ്രിയ ആയിരുന്ന റിമി ഇഷ്ടവിഭവങ്ങളൊക്കെ ഒഴിവാക്കിയാണ് ഭാരം കുറച്ചത്. ഭാരം കുറഞ്ഞതോടെ സന്തോഷവും സംതൃപ്തിയും വർധിച്ചുവെന്നും ഏതു വസ്ത്രവും ധരിക്കാമെന്ന ആത്മവിശ്വാസമുണ്ടായി എന്നും റിമി മുൻപ് അഭിമുഖങ്ങളിൽ വെളിപ്പെടുത്തിയിട്ടുണ്ട്.