പ്രണയം പറഞ്ഞ് മോഹൻലാലും മീനയും; പൃഥ്വിക്കൊപ്പം തിളങ്ങി കല്യാണി; ‘ബ്രോ ഡാഡി’യിലെ വിഡിയോ ഗാനം
Mail This Article
മോഹൻലാലും പൃഥ്വിരാജും പ്രധാന വേഷങ്ങളിലെത്തുന്ന ‘ബ്രോ ഡാഡി’യിലെ പുതിയ ഗാനം പുറത്തിറങ്ങി. ‘പറയാതെ വന്നെൻ’ എന്നു തുടങ്ങുന്ന വിഡിയോ ഗാനമാണ് പ്രേക്ഷകർക്കരികിലെത്തിയത്. ദീപ്ക ദേവ് സംഗീതം പകർന്ന ഗാനം എം.ജി.ശ്രീകുമാറും വിനീത് ശ്രീനിവാസനും ചേർന്ന് ആലപിച്ചിരിക്കുന്നു. ലക്ഷ്മി ശ്രീകുമാർ ആണ് പാട്ടിനു വരികൾ കുറിച്ചത്.
മോഹൻലാലും മീനയും പൃഥ്വിരാജും കല്യാണി പ്രിയദർശനുമാണ് ഗാനരംഗങ്ങളിൽ പ്രത്യക്ഷപ്പെടുന്നത്. മനോഹരമായ പ്രണയരംഗങ്ങൾ കോർത്തിണക്കിയൊരുക്കിയ ഗാനം മികച്ച ആസ്വാദനാനുഭവം സമ്മാനിക്കുന്നു. ചുരുങ്ങിയ സമയത്തിനകം ശ്രദ്ധിക്കപ്പെട്ട പാട്ടിനു മികച്ച പ്രതികരണങ്ങളാണു ലഭിക്കുന്നത്.
ലൂസിഫറിന് ശേഷം മോഹന്ലാലിനെ നായകനാക്കി പൃഥ്വിരാജ് സുകുമാരന് സംവിധാനം ചെയ്യുന്ന ചിത്രമാണ് ‘ബ്രോ ഡാഡി’. ജോൺ കാറ്റാടി എന്ന കഥാപാത്രമായി മോഹന്ലാലും അദ്ദേഹത്തിന്റെ മകൻ ഈശോ ജോണ് കാറ്റാടിയായി പൃഥ്വിരാജും എത്തുന്നു. മീന മോഹൻലാലിന്റെ ഭാര്യയായി വേഷമിടുന്നു. ഉണ്ണി മുകുന്ദന്, സൗബിന് ഷാഹിര്, ജാഫര് ഇടുക്കി, ലാലു അലക്സ്, ജഗദീഷ്, കല്യാണി പ്രിയദര്ശന്, നിഖില വിമല്, കനിഹ, കാവ്യ എം.ഷെട്ടി, മല്ലിക സുകുമാരൻ എന്നിവരാണ് മറ്റു താരങ്ങൾ.