താളം പിടിപ്പിച്ച് ബെന്നി ദയാൽ; ‘നേരാണേ’ പാട്ട് ഹിറ്റ്

‘പ്രിയൻ ഓട്ടത്തിലാണ്’ എന്ന ചിത്രത്തിലെ പുതിയ ഗാനം പുറത്തിറങ്ങി. പ്രജീഷ് പ്രേം എഴുതിയ ‘നേരാണേ’ എന്നു തുടങ്ങുന്ന പാട്ടിന്റെ ലിറിക്കൽ വിഡിയോ ആണ് പ്രേക്ഷകർക്കരികിലെത്തിയത്. ലിജിൻ ബംബിനോ സംഗീതം നൽകിയിരിക്കുന്നു. ബെന്നി ദയാൽ ആണ് ഗാനം ആലപിച്ചത്. 

പാട്ട് ഇതിനകം ശ്രദ്ധിക്കപ്പെട്ടുകഴിഞ്ഞു. മികച്ച പ്രതികരണങ്ങളും ലഭിക്കുന്നുണ്ട്. വിനായക് ശശികുമാർ, ശബരീഷ് വർമ എന്നിവരാണ് ചിത്രത്തിനു വേണ്ടി മറ്റു ഗാനങ്ങൾ എഴുതിയിരിക്കുന്നത്.

C/O സൈറ ബാനു എന്ന ചിത്രത്തിനു ശേഷം ഷറഫുദ്ദീൻ, നൈല ഉഷ, അപർണ ദാസ് എന്നിവരെ പ്രധാന കഥാപാത്രങ്ങളാക്കി ആന്റണി സോണി സംവിധാനം ചെയ്യുന്ന ചിത്രമാണ് ‘പ്രിയൻ ഓട്ടത്തിലാണ്’. വൗ സിനിമാസിന്റെ ബാനറിൽ സന്തോഷ് ത്രിവിക്രമൻ ചിത്രം നിർമിക്കുന്നു.

ബിജു സോപാനം, ഹക്കിം ഷാജഹാൻ, സുധി കോപ്പ, ജാഫർ ഇടുക്കി, സ്മിനു സിജോ, അശോകൻ, ഹരിശ്രീ അശോകൻ, ഷാജു ശ്രീധർ, അനാർക്കലി മരക്കാർ  തുടങ്ങിയവരാണു മറ്റു പ്രധാന താരങ്ങള്‍.