മരുഭൂമിയുടെ സംഗീതം തേടി; ആടുജീവിതം ലൊക്കേഷനിൽ എ.ആർ. റഹ്മാന്, വിഡിയോ പുറത്ത്
Mail This Article
പൃഥ്വിരാജ് സുകുമാരനെ നായകനാക്കി ബ്ലെസി സംവിധാനം ചെയ്യുന്ന ‘ആടുജീവിതം’ സിനിമയുടെ ലൊക്കേഷനിലെത്തിയ സംഗീതസംവിധായകൻ എ.ആർ.റഹ്മാന്റെ വിഡിയോ പുറത്ത്. നീണ്ട മുപ്പത് വർഷങ്ങൾക്കു ശേഷം റഹ്മാന് മലയാളത്തിൽ സംഗീതമൊരുക്കുന്ന ചിത്രമാണ് ‘ആടുജീവിതം’. 1992 ൽ പുറത്തിറങ്ങിയ മോഹൻലാൽ ചിത്രം യോദ്ധയാണ് റഹ്മാന്റെ സംഗീതത്തിൽ പുറത്തുവന്ന അവസാന മലയാള സിനിമ.
റഹ്മാൻ ആടുജീവിതത്തിന്റെ ലൊക്കേഷനിൽ എത്തിയതിന്റെ ചിത്രങ്ങൾ ബ്ലെസി നേരത്തേ പങ്കുവച്ചത് വൈറൽ ആയിരുന്നു. ‘മരുഭൂമിയുടെ സംഗീതം തേടി’ എന്ന അടിക്കുപ്പോടെയായിരുന്നു ബ്ലെസിയുടെ സമൂഹമാധ്യമ പോസ്റ്റ്. ‘രണ്ട് ദിവസത്തേക്ക് ഫോണും ഇന്റർനെറ്റും ഇല്ല, കുറെ ഒട്ടകങ്ങളും ആടും മാത്രം കൂട്ടിന്’ എന്നു കുറിച്ച് റഹ്മാനും ചിത്രങ്ങള് പങ്കുവച്ചിരുന്നു.
സിനിമാപ്രേമികളെല്ലാം കാത്തിരിക്കുന്ന ചിത്രമാണ് ബെന്യാമിന്റെ പ്രശസ്ത നോവലിനെ ആധാരമാക്കിയുള്ള ആടുജീവിതം. സൗദി അറേബ്യയിലെ ഇന്ത്യന് കുടിയേറ്റ തൊഴിലാളിയായ നജീബ് എന്ന കഥാപാത്രത്തെയാണ് ചിത്രത്തില് പൃഥ്വിരാജ് അവതരിപ്പിക്കുന്നത്. പൃഥ്വിരാജിനെ കൂടാതെ അമലാപോളും ശോഭാ മോഹനുമാണ് മലയാളത്തില് നിന്നുള്ള മറ്റു താരങ്ങള്.