ജോമോന്റെ സുവിശേഷം എന്ന ചിത്രത്തിലെ പൂങ്കാറ്റേ എന്ന പാട്ട് പുറത്തിറങ്ങി. പാട്ടിന്റെ രംഗങ്ങളിലൂടെ തന്നെയറിയാം എത്രമാത്രം മനോഹരമായ കുടുംബ ചിത്രമാണിതെന്ന്. ആ രംഗങ്ങൾക്ക് വിദ്യാസാഗറിന്റെ ഈണം കൂടിയായപ്പോൾ പാട്ട് ഏറെ പ്രിയപ്പെട്ടതായി.
സിനിമയുടെ കഥ സത്യൻ അന്തിക്കാട് പറഞ്ഞപ്പോൾ ഇടയ്ക്ക് ദുൽക്കർ ചോദിച്ചു, ആരാണ് ഈ ചിത്രത്തിൽ തന്റെ അച്ഛനായി അഭിനയിക്കുന്നതെന്ന്. മുകേഷ് ആണെന്നു മറുപടി പറഞ്ഞപ്പോൾ ഇനി കഥ കേൾ‌ക്കണ്ട. താൻ ഓകെ ആണെന്ന് പറയുകയായിരുന്നു ദുൽക്കർ. കാരണം കുട്ടിക്കാലം തൊട്ടേ അത്രയേറെ അടുപ്പമുണ്ട് മുകേഷിനോട് ദുൽക്കറിനോട്. ആ സ്നേഹബന്ധം തന്നെയാണ് ചിത്രത്തിലെ ഈ ഗാനത്തെ ഇത്രയേറെ മനോഹരമാക്കിയത്.
റഫീഖ് അഹമ്മദിന്റെ വരികൾ പാടിയത് ബൽറാം ആണ്. അച്ഛന്റെയും മകന്റെയും സ്നേഹം പോലെ മനസിനോട് ഏറെ ചേർന്നു നിൽക്കുന്ന ഈണം. ഷെഹ്നായിയും പുല്ലാങ്കുഴലും ചേർന്ന ഓർക്കസ്ട്ര പാട്ടിനെ കേൾവി സുന്ദരമാക്കുന്നു. അടുത്തിടെ കേട്ട സുന്ദരമായ ഈണങ്ങളിലൊന്നാക്കി മാറ്റുന്നു.
