എസ്ബിഐ വായ്പാപലിശ 0.10% കുറച്ചു; സേവിങ്സ് ബാങ്ക് പലിശ 0.25% താഴ്ത്തി

മുംബൈ ∙ സ്റ്റേറ്റ് ബാങ്ക് ഓഫ് ഇന്ത്യ (എസ്ബിഐ) വായ്പകളുടെ അടിസ്ഥാന പലിശനിരക്കും സേവിങ്സ് ബാങ്ക് നിക്ഷേപ പലിശനിരക്കും  കുറച്ചു.വായ്പകളുടെ പലിശ റിസർവ് ബാങ്കിന്റെ അടിസ്ഥാന നിരക്കായ റീപ്പോയുമായി ബന്ധിപ്പിക്കുന്ന രീതിക്കു മുൻപുള്ള വായ്പകളുടെ അടിസ്ഥാന നിരക്കായ എംസിഎൽആർ ആണ് 0.10% താഴ്ത്തിയത്. ഇന്നു മുതൽ ബാധകമായ എംസിഎൽആർ 8.05%. എംസിഎൽആർ ബന്ധിതമായ എല്ലാത്തരം വായ്പകളുടെയും പലിശനിരക്കിൽ 0.10% കുറവുണ്ടാകും.

റീപ്പോ പലിശനിരക്കിൽ 0.25% കുറവാണ് റിസർവ് ബാങ്ക് വരുത്തിയത്. ബാങ്കുകളുടെ ധനസമാഹരണച്ചെലവു കൂടി കണക്കിലെടുത്തുള്ളതാണ് എംസിഎൽആർ (മാർജിനൽ കോസ്റ്റ് ഓഫ് ഫണ്ട്സ് ബേസ്ഡ് ലെൻഡിങ് റേറ്റ്).ഒരു ലക്ഷം രൂപ വരെയുള്ള സേവിങ്സ് ബാങ്ക് നിക്ഷേപങ്ങളുടെ പലിശ 3.5% ആയിരുന്നത് 3.25% ആക്കി. ഇത് നവംബർ ഒന്നിനു നിലവിൽ വരും.സ്ഥിര നിക്ഷേപ പലിശയിൽ 0.10% (ഒരു വർഷം വരെയുള്ള നിക്ഷേപം), 0.30% (ഒരു വർഷം – 2 വർഷത്തിനു താഴെ) എന്നിങ്ങനെയും കുറവു വരുത്തി.