പരിധിവിട്ട് കമ്മി: 102%

ന്യൂഡൽഹി∙ സർക്കാരിന്റെ ചെലവും വരവും തമ്മിലുള്ള അന്തരമായ ധനകമ്മി, ഇക്കൊല്ലം ബജറ്റിൽ ലക്ഷ്യമിട്ട വാർഷിക പരിധി 7 മാസം കൊണ്ടുതന്നെ മറികടന്നു.  കഴിഞ്ഞ മാസം അവസാനത്തെ കമ്മി 7.2 ലക്ഷം കോടി രൂപ. മൊത്തം സമ്പദ് വ്യവസ്ഥയുടെ (ജിഡിപി) 3.3% എന്ന കണക്കിൽ 7.03 ലക്ഷം കോടി രൂപയാണ് ഇക്കൊല്ലം ബജറ്റിൽ കമ്മിക്കു നിശ്ചയിച്ച പരിധി. ഇതിന്റെ 102% ആണ് ഒക്ടോബറിലുള്ളത്.

സെപ്റ്റംബറിൽ കമ്പനികൾക്കുള്ള നികുതി കുറച്ചത് വരുമാനത്തിൽ1.45 ലക്ഷം കോടി രൂപ കുറവുവരുത്തുമെന്നു കണക്കാക്കിയിരുന്നു. എന്നാൽ അതാകണമെന്നില്ല കമ്മി ഉയരാൻ കാരണം. അതതുമാസത്തെ വിവിധ വരുമാനങ്ങളിലെ ഏറ്റക്കുറച്ചിലുകൾ കമ്മിയുടെ കണക്കിൽ വരും. വർഷാവസാനത്തെ കണക്കുകളിലാവും മൊത്തം വരവിന്റെയും ചെലവിന്റെയും സ്വഭാവം വ്യക്തമാകുക.