വിലക്കയറ്റം കൂടി; വ്യവസായം തളർന്നു

ന്യൂഡൽഹി∙ രാജ്യത്തെ ചില്ലറ വ്യാപാര വിലക്കയറ്റം അഞ്ചര വർഷത്തെ ഏറ്റവും ഉയർന്ന നിലയിൽ. ഉപഭോക്തൃവില സൂചികയിൽ 7.59 ശതമാനമാണ് ജനുവരിയിലെ വർധന.  ഭക്ഷ്യവിലക്കയറ്റം 13.63%ആണ്. ഡിസംബറിൽ മൊത്തം വിലക്കയറ്റത്തോത് 7.35 ശതമാനവും ഭക്ഷ്യവിലക്കയറ്റം 14.19 ശതമാനവും ആയിരുന്നു. പച്ചക്കറിവില മാത്രമെടുത്താൽ ജനുവരിയിൽ 50% വർധനയുണ്ട്.

ഡിസംബറിലെ വ്യാവസായിക വളർച്ച 0.3 ശതമാനം താഴ്ന്നതും തിരിച്ചടിയായി. നവംബറിൽ ഇത് 1.8% വളർച്ച രേഖപ്പെടുത്തിയിരുന്നു.  മുൻവർഷത്തെ അപേക്ഷിച്ച് 2019 ഏപ്രിൽ –ഡിസംബർ കാലത്തെ വ്യാവസായിക വളർച്ചാ നിരക്ക് 0.5% ആണ്. നിർമാണമേഖലയിലെ ഉൽപാദനം 1.2 ശതമാനമായും വൈദ്യുതി ഉൽപാദനം 0.1 ശതമാനമായും കുറഞ്ഞിട്ടുണ്ട്. കഴിഞ്ഞ വർഷം ഇതേ മാസത്തിൽ ഇവ യഥാക്രമം 2.9 ശതമാനവും 4.5 ശതമാനവുമായിരുന്നു.