ആദായനികുതി, ജിഎസ്ടി റിട്ടേൺ ജൂൺ 30 വരെ
Mail This Article
ന്യൂഡൽഹി ∙ കോവിഡിന്റെ പശ്ചാത്തലത്തിൽ, ആദായ നികുതി, ചരക്ക് സേവന നികുതി (ജിഎസ്ടി) തുടങ്ങിയവയുടെ റിട്ടേൺ ഫയൽ ചെയ്യാനുള്ള സമയപരിധി 3 മാസത്തേക്കു നീട്ടി. വായ്പകളുടെ തിരിച്ചടവ്, കിട്ടാക്കടം തുടങ്ങിയവയ്ക്കുള്ള സമയപരിധി നീട്ടുന്നതിന് ഉടനെ തീരുമാനമുണ്ടായേക്കുമെന്ന് ധനമന്ത്രി നിർമല സീതാരാമൻ പറഞ്ഞു.
ആദായനികുതി
∙2018–19 ലെ ആദായനികുതി റിട്ടേൺ സമർപ്പണത്തിനു ജൂൺ 30 വരെ സമയം
∙വൈകിയടച്ചാൽ പലിശ 9%. ലേറ്റ് ഫീ/പിഴ ഈടാക്കില്ല.
∙സ്രോതസ്സിൽ ഈടാക്കിയ നികുതി (ടിഡിഎസ്) ജൂൺ 30 വരെ അടയ്ക്കാം. വൈകിയാൽ പലിശ 9% ആയി കുറച്ചു.
∙ആദായ നികുതി തർക്കം പരിഹരിക്കാനുള്ള ‘വിവാദ് സേ വിശ്വാസ്’ പദ്ധതിയിൽ 10% അധികം തുക നൽകാതെ തീർപ്പാക്കൽ ജൂൺ 30 വരെ നീട്ടി
ആധാർ – പാൻ
∙ആധാർ – പാൻ ബന്ധിപ്പിക്കൽ അവസാന തീയതി ജൂൺ 30 വരെ നീട്ടി ജിഎസ്ടി
∙ മാർച്ച്, ഏപ്രിൽ, മേയ് റിട്ടേൺ ജൂൺ 30 വരെ ഫയൽ ചെയ്യാം.
∙അനുമാന നികുതി റിട്ടേൺ ജൂൺ 30 വരെ ഫയൽ ചെയ്യാം.
∙അനുമാന നികുതി വ്യവസ്ഥയിലേക്കു മാറാനും ജൂൺ 30 വരെ അവസരം.
∙വൈകിയുള്ള നികുതിയടവ്: 5 കോടി രൂപവരെ വാർഷിക വിറ്റുവരവുള്ളവർ പലിശയും പിഴയും ലേറ്റ് ഫീസും നൽകേണ്ടതില്ല; അല്ലാത്തവരുടെ പലിശ 9% ആയി കുറച്ചു; ലേറ്റ് ഫീ/പിഴ ഇല്ല.
∙ 2018–19 ലെ വാർഷിക റിട്ടേൺ ജൂൺ 30 വരെ ഫയൽ െചയ്യാം.
ബാങ്കിങ്, എടിഎം
∙എടിഎം ഉപയോഗത്തിനുള്ള സർവീസ് ചാർജ് ഒഴിവാക്കി; ഏതു ബാങ്കിന്റെ എടിഎമ്മിലും ഡെബിറ്റ് കാർഡ് ഉപയോഗിച്ച് പണം പിൻവലിക്കൽ സൗജന്യം
∙ബാങ്ക് അക്കൗണ്ടുകൾക്കുള്ള മിനിമം ബാലൻസ് നിബന്ധനയില്ല
∙ഡിജിറ്റൽ വ്യാപാര ഇടപാടുകൾക്കുള്ള നിരക്ക് കുറയ്ക്കും