ഹെക്ടർ പ്ലസ് വിപണിയിൽ

കൊച്ചി∙ എംജി മോട്ടർ ഇന്ത്യയുടെ 6-സീറ്റർ എസ്‌യുവി ‘ഹെക്ടർ പ്ലസ്’ വിപണിയിൽ എത്തി. 1.5 ലീറ്റർ പെട്രോൾ എ‍ൻജിനുള്ള പതിപ്പിന് 13.49 ലക്ഷം രൂപ മുതൽ 18.21 ലക്ഷം രൂപ വരെയും 2–ലീറ്റർ ഡീസൽ എൻജിൻ പതിപ്പിന് 14.44 ലക്ഷം-18.54 ലക്ഷം നിലവാരത്തിലും (ഡൽഹി ഷോറൂം വില) ആണു വില. പെട്രോൾ ഓട്ടമാറ്റിക് ഗിയറുമായും ലഭിക്കും.

3 നിര സീറ്റുകളുള്ള ഹെക്ടർ പ്ലസ് മധ്യനിരയിൽ ആഡംബരപൂർണമായ ക്യാപ്റ്റൻ സീറ്റുകളോടെയാണ് എത്തുന്നത്. സെപിയ ബ്രൗൺ ഇന്റീരിയർ, ആകർഷക ഹെഡ് ലാംപ്, ക്രോം-സ്റ്റഡഡ് ഫ്രന്റ് ഗ്രിൽ, പനോരമിക് സൺറൂഫ് തുടങ്ങിയ സവിശേഷതകളുണ്ട്. 5-വർഷം കിലോമീറ്റർ പരിധിയില്ലാത്ത വാറന്റി, 5 വർഷം റോഡ്‌സൈഡ് അസിസ്റ്റൻസ്, ആദ്യ 5 സർവീസുകൾക്ക് ലേബർ ചാർജ്  എന്നിവ സൗജന്യമാണ്. ഗുജറാത്തിലെ ഹാലോലിലാണു നിർമാണം.