കെഎഫ്സി 5000 സംരംഭകർക്ക് 1500 കോടി വായ്പ നല്കും
Mail This Article
കൊച്ചി∙ മുഖ്യമന്ത്രിയുടെ സംരംഭക വികസന പരിപാടി എന്ന പേരിൽ പുതിയ വായ്പാപദ്ധതിക്ക് കെഎഫ്സി 1500 കോടിയുടെ ഫണ്ട് രൂപീകരിക്കുന്നു. കടപ്പത്രം പുറപ്പെടുവിച്ചും ബാങ്ക് വായ്പയെടുത്തുമാണിത്. വർഷം 1000 ചെറുകിട സംരംഭകർക്ക് പരമാവധി 50 ലക്ഷം രൂപ വരെയുള്ള വായ്പ നൽകുകയാണുദ്ദേശ്യം.
5 വർഷം തുടർച്ചയായി നടപ്പാക്കുമ്പോൾ 5000 സംരംഭകർക്കു പ്രയോജനം ലഭിക്കും.വായ്പകളുടെ പലിശ 10% ആണെങ്കിലും 3% പലിശ സബ്സിഡി ലഭിക്കുന്നതിനാൽ ഫലത്തിൽ 7% മാത്രം. പദ്ധതിയുടെ ഗുണഭോക്താക്കളായ സ്റ്റാർട്ടപ് കമ്പനികളെയും എംഎസ്എംഇ യൂണിറ്റുകളെയും തിരഞ്ഞെടുക്കാൻ കെഎഫ്സി പ്രതിനിധിയും നോഡൽ ഓഫിസറും ബാങ്കിങ്, വ്യവസായ വിദഗ്ധരും അടങ്ങുന്ന സമിതിയെ നിയോഗിക്കും.
18–50 പ്രായവിഭാഗത്തിലുള്ള സംരംഭകർക്കാണു വായ്പ നൽകുക.യോഗ്യരായ സംരംഭകരെ ലഭിക്കാൻ 10000 പേർക്ക് സംരംഭക പരിശീലനവും നൽകും.