റിലയൻസിന് വരുമാനം കുറഞ്ഞു; ലാഭം ഉയര്‍ന്നു

ന്യൂഡൽഹി∙ റിലയൻസ് ഇൻഡസ്ട്രീസ് ലിമിറ്റഡ് ഏപ്രില്‍– ജൂൺ പാദത്തിൽ മുൻകൊല്ലം ഇതേ കാലയളവിലെക്കാൾ 30.6% കൂടുതൽ ലാഭം നേടി. 13248 കോടി രൂപയാണ് ഇക്കുറി ലാഭം. എന്നാൽ, മൊത്തം വിറ്റുവരവ് മുൻകൊല്ലം ഇതേ കാലയളവിലെക്കാൾ 42% ഇടിഞ്ഞ് 1,00,929 കോടിയായി. ഇന്ധനറീട്ടെയിൽവിൽപന ബിസിനസിലെ ഓഹരി ‘ബിപി’ക്കു വിറ്റപ്പോൾ 4966 കോടി രൂപ ലാഭം കിട്ടിയതാണ്, പ്രവർത്തന വരുമാനം കുറഞ്ഞിട്ടും ലാഭം ഉയരാൻ കാരണം. എണ്ണവിലയിലെ ഇടിവും ലോക്ഡൗൺ കാരണം റീട്ടെയിൽ ബിസിനസിലുണ്ടായ ഇടിവുമാണ് വരുമാനം കുറയാൻ മുഖ്യകാരണം.

ജിയോയ്ക്കു വൻ വളർച്ച

ജിയോപ്ലാറ്റ്ഫോംസിന്റെ ഡിജിറ്റൽ ബിസിനസുകളെല്ലാം വളർച്ച നേടി. ജിയോയുടെ ത്രൈമാസ ലാഭം 2250 കോടി രൂപയാണ്. മുൻകൊല്ലം ഇതേ കാലത്ത് 891കോടിയായിരുന്നു. വർധന 183%. ഒരു ജിയോ ഉപയോക്താവിൽനിന്ന് കമ്പനിക്ക് ഒരു മാസത്തെ ശരാശരി വരുമാനം 140.3 രൂപയാണ്.